فرمان الہی
نماز کے اوقات
پاکستان کرکٹ بورڈ (پی سی بی) نے بنگلادیش کرکٹ ٹیم کے خلاف دو اضافی مینز ٹی ٹوئنٹی انٹرنیشنل میچز کی تصدیق کردی۔
پاکستان اور بنگلادیش آئی سی سی مینز ٹی ٹوئنٹی ورلڈکپ کی تیاری کےلیے 5 ٹی ٹوئنٹی میچز کھیلیں گے۔
فیصل آباد 17 سال بعد ایک بار پھر بین الاقوامی کرکٹ کی میزبانی کرے گا۔
یہ سیریز فیوچر ٹور پروگرام (ایف ٹی پی) کا حصہ ہے جو دراصل 3 ون ڈے اور 3 ٹی ٹوئنٹی انٹرنیشنل میچز پر مشتمل تھی تاہم آئندہ سال آئی سی سی مینز ٹی ٹوئنٹی ورلڈکپ کے پیش نظر دونوں کرکٹ بورڈز نے باہمی طور پر ون ڈے میچز کی جگہ 2 اضافی ٹی ٹوئنٹی انٹرنیشنل کھیلنے پر اتفاق کیا ہے۔
پانچ میچوں کی ٹی ٹوئنٹی سیریز 25 مئی سے 3 جون تک فیصل آباد اور لاہور میں کھیلی جائے گی۔
فیصل آباد کا اقبال اسٹیڈیم جس نے گزشتہ سال ستمبر میں افتتاحی چیمپئنز ون ڈے کپ اور گزشتہ ماہ نیشنل ٹی ٹوئنٹی کپ کی کامیابی کے ساتھ میزبانی کی، سیریز کے پہلے اور دوسرے ٹی ٹوئنٹی کی میزبانی بالترتیب 25 اور 27 مئی کو کرے گا۔
اقبال اسٹیڈیم فیصل آباد جو اس سے قبل 1978ء سے 2008ء کے درمیان 24 ٹیسٹ اور 16 ون ڈے میچز کی میزبانی کر چکا ہے، 17 سال کے وقفے کے بعد بین الاقوامی کرکٹ کی واپسی کو خوش آمدید کہے گا۔
اس اسٹیڈیم میں آخری بین الاقوامی میچ اپریل 2008ء میں بنگلادیش اور پاکستان کے درمیان کھیلا گیا تھا۔
لاہور کا قذافی اسٹیڈیم 30 مئی، یکم جون اور 3 جون کو بقیہ 3 ٹی ٹوئنٹی میچوں کی میزبانی کرے گا۔
بنگلادیشی ٹیم 21 مئی کو پاکستان پہنچے گی اور 22 سے 24 مئی تک اقبال اسٹیڈیم میں تربیتی سیشن کرے گی۔
