فرمان الہی
نماز کے اوقات
پاکستان میں صارفین کی بغیر وی پی این کے سوشل میڈیا پلیٹ فارم ایکس تک رسائی بحال ہونے کی اطلاعات ہیں۔
پاکستان میں سوشل میڈیا پلیٹ فارم ایکس (سابقہ ٹوئٹر) گزشتہ روز بغیر وی پی این یا پراکسی کے قابلِ رسائی ہوگیا، جس سے ملک بھر میں صارفین نے سکھ کا سانس لیا، یہ پیش رفت ایک سال سے زائد عرصے کی بندش کے بعد سامنے آئی۔
فروری 2024ء کے عام انتخابات کے بعد ملک گیر احتجاج اور مبینہ دھاندلی کے الزامات کے تناظر میں حکومت نے 17 فروری کو ایکس تک رسائی معطل کر دی تھی، اس بندش کے بعد لاکھوں پاکستانیوں کو پلیٹ فارم استعمال کرنے کے لیے وی پی این یا دیگر متبادل ذرائع کا سہارا لینا پڑا۔
گزشتہ روز صبح سے مختلف شہروں میں ایکس تک براہِ راست رسائی حاصل ہونے کی اطلاعات تھیں، سوشل میڈیا پر متعدد صارفین نے اپنی خوشی کا اظہار کرتے ہوئے بتایا کہ وہ بغیر کسی رکاوٹ کے ایکس استعمال کر رہے ہیں۔
اگرچہ حکومتی سطح پر تاحال اس پابندی کے مکمل خاتمے کی سرکاری تصدیق نہیں کی گئی۔
یہ اقدام ایک ایسے وقت میں سامنے آیا جب پاکستان اور بھارت کے درمیان کشیدگی جاری ہے، گزشتہ روز بھارتی فضائیہ نے پاکستان کے مختلف علاقوں میں فضائی حملے کیے جس کے بعد پاکستان کی مسلح افواج نے بھرپور جوابی کارروائی کرتے ہوئے بھارتی فضائیہ کے 5 طیارے مار گرائے۔
