فرمان الہی
نماز کے اوقات
آرٹس کونسل آف پاکستان کراچی کی جانب سے آپریشن ’بنیان مرصوص‘ کی کامیابی پر یومِ تشکر کے حوالے سے پرچم کشائی کی تقریب کا انعقاد جون ایلیا لان میں کیا گیا۔
تقریب کا مقصد افواجِ پاکستان سے اظہارِ یکجہتی اور انہیں خراجِ تحسین پیش کرنا تھا، جس کا آغاز قومی ترانے سے کیا گیا۔
یومِ تشکر پر صدر آرٹس کونسل محمد احمد شاہ نے گورننگ باڈی اراکین کے ہمراہ پاکستانی پرچم بلند کیا۔
تقریب میں آرٹس کونسل کے ممبران، طلباء سمیت ملازمین کی بڑی تعداد میں شرکت کی۔
آرٹس کونسل کی فضاء ’پاکستان زندہ باد‘ کے نعروں سے گونج اٹھی، اس موقع پر صدر آرٹس کونسل محمد احمد شاہ نے کہا کہ آج پورے پاکستان میں یومِ تشکر منایا جا رہا ہے، شہداءکی یادگاروں پر پھول چڑھائے جا رہے ہیں۔
انہوں نے کہا کہ ایک خوفناک لڑائی جو دشمن نے ہم پر مسلط کی تھی، اس میں ہم سرخرو رہے، جو جنگ دشمن نے شروع کی تھی، اس کو اللّٰہ کی مدد سے پاکستان کی پاک فضائیہ، آرمی اور نیوی نے مل کر ختم کیا۔
محمد احمد شاہ نے یہ بھی کہا کہ ہم سے 7 گنا بڑے دشمن کو پاکستان کی آرمی، پاک فضائیہ اور نیوی نے منہ توڑ جواب دیا، یہ قابلِ فخر کارنامہ ہے۔
اُن کا کہنا تھا کہ ہم نے پوری دنیا کو یہ پیغام دیا ہے کہ ہم امن پسند لوگ ہیں، ہم اپنے ملک سے محبت کرتے ہیں، جب بھی اس ملک پر حملہ ہو گا یہ 25 کروڑ عوام ایک ہو کر اپنے ملک کا دفاع کرے گی۔
انہوں نے کہا کہ نریندر مودی کی ننگی جارحیت کسی صورت قبول نہیں، بھارت کے دہشت گرد جس طرح پاکستان کے مختلف حصوں میں کارروائیاں کر رہے ہیں، ان کے آخری انجام تک یہ قوم مودی کی دہشت گردی کا پردہ فاش کرے گی۔
