فرمان الہی
نماز کے اوقات
کراچی ( اسٹاف رپورٹر) کراچی چیمبر آف کامرس اینڈ انڈسٹری (کے سی سی آئی) کے صدرمحمد جاوید بلوانی نے وفاقی و سندھ بجٹ 2025-26کو شدید مایوس کن اور کراچی جیسے ملک کے معاشی مرکز کے ساتھ کھلی ناانصافی قرار دیتے ہوئے اس کی سخت الفاظ میں مذمت کی ہے۔ایک بیان میں انہوں نے کہا کہ پاکستان کی خوشحالی کراچی کی خوشحالی سے جڑی ہوئی ہے اور اس شہر کو نظرانداز کرنا گویا قومی معیشت کو تباہی کی طرف لے جانے کے مترادف ہے۔کراچی اور مجموعی طور پر سندھ کو ترقیاتی فنڈز کی فراہمی میں مسلسل نظر انداز کرنا اور ضروری منصوبوں کو مسلسل موخر کرنا انتہائی قابلِ افسوس اور امتیازی رویہ ہے۔انہوں نے خاص طور پر سکھرحیدرآباد موٹروے جیسے اہم انفراسٹرکچر منصوبے کے لیے وفاقی بجٹ میں انتہائی قلیل رقم مختص کیے جانے پر شدید تشویش کا اظہارکرتے ہوئے کہا کہ یہ منصوبہ سندھ اور کراچی کے لیے معاشی روابط کا اہم ذریعہ ہے جس کی کل لاگت 400 ارب روپے سے زائد ہے مگر وفاقی بجٹ میں صرف 15 ارب روپے رکھے گئے ہیں جو اس اہم منصوبے کو مکمل کرنے کے لیے قطعی ناکافی ہے اور سندھ کی ترقیاتی ترجیحات سے کھلی بے اعتنائی کو ظاہر کرتا ہے۔
