فرمان الہی
نماز کے اوقات
وزیرِ اعلیٰ پنجاب مریم نواز شریف نے کہا ہے کہ جس دن ایک غریب کے سر پر چھت آجاتی ہے، اس دن ریاست کامیاب ہو جاتی ہے، ہماری دن رات کوشش ہے کہ پنجاب کا کوئی شہری بغیر چھت کے نہ رہے۔
وزیرِ اعلیٰ پنجاب کی زیرِ صدارت ’اپنی چھت، اپنا گھر‘ منصوبے پر اجلاس ہوا۔
اجلاس کے دوران وزیرِ اعلیٰ کو بریفنگ میں بتایا گیا کہ اب تک 51 ہزار 911 نادار خاندانوں کو قرضہ فراہم کیا جا چکا ہے، 60 ارب 50 کروڑ روپے کی رقم تقسیم کی جا چکی ہے، 45 ہزار سے زائد گھر زیرِ تعمیر ہیں جبکہ 6 ہزار ایک سو سے زائد گھر مکمل ہو چکے ہیں۔
مریم نواز نے اجلاس سے خطاب کے دوران منصوبے کی رفتار مزید تیز کرنے کا حکم دیتے ہوئے کہا کہ عوام کی ترقی، تحفظ اور سہولت نواز شریف کا وژن اور ان کا عہد ہے، پاکستان میں پہلی بار ایسا ہوا ہے کہ اتنے بڑے پیمانے پر غریب اور بے گھر خاندانوں کے لیے عملی اقدامات ہو رہے ہیں، میری دن رات کوشش ہے کہ پنجاب کا کوئی شہری بغیر چھت کے نہ رہے۔
یاد رہے کہ مئی 2025ء میں وزیرِ اعلیٰ پنجاب مریم نواز نے ’اپنی زمین، اپنا گھر‘ ای پورٹل کا افتتاح کیا تھا جس کے تحت پنجاب کے 19 اضلاع میں 23 ہاؤسنگ اسکیموں میں 2 ہزار پلاٹ دیے جائیں گے۔
