فرمان الہی
نماز کے اوقات
آرمی چیف فیلڈ مارشل سید عاصم منیر کا کہنا ہے کہ بھارت اپنے آپ کو ’وشوا گرو‘ کے طور پر پیش کرنا چاہتا ہے لیکن عملی طور پر ایسا کچھ نہیں۔
امریکا میں پاکستانی کمیونٹی سے خطاب میں فیلڈ مارشل عاصم منیر نے کہا کہ بھارتی جارحیت نے خطے کو ایک خطرناک جنگ کے دہانے پر لا کھڑا کیا ہے، کسی بھی وجہ سے دو طرفہ تصادم بہت بڑی غلطی ہو گی۔
آرمی چیف نے کہا کہ پاکستان امریکی صدر ڈونلڈ ٹرمپ کا انتہائی مشکور ہے جن کی اسٹریٹجک لیڈر شپ نے ناصرف پاک بھارت جنگ بلکہ دنیا میں بہت سی جنگوں کو روکا، پاکستان نے اس اشتعال انگیزی کا پُرعزم اور بھرپور جواب دیا، بھارت اب بھی خطے میں عدم استحکام پیدا کرنے پر بضد ہے۔
انہوں نے کہا کہ پاکستان واضح کرچکا ہے کہ کسی بھی بھارتی جارحیت کا منہ توڑجواب دیا جائے گا، مقبوضہ کشمیر بھارت کا کوئی اندرونی معاملہ نہیں بلکہ ایک نامکمل بین الاقوامی ایجنڈا ہے، قائدِاعظم نے کہا تھا کہ کشمیر پاکستان کی ’شہ رگ‘ ہے، مقبوضہ کشمیر پر اقوامِ متحدہ کی سلامتی کونسل کی قراردادیں بھی موجود ہیں، پاکستان ان قراردادوں کی مکمل حمایت کرتا ہے۔
فیلڈ مارشل سید عاصم منیر نے کہا کہ پاکستان نے بھارت کی امتیازی اور دوغلی پالیسیوں کے خلاف کامیاب سفارتی جنگ لڑی، حالیہ بھارتی جارحیت شرم ناک بہانوں کے ساتھ کی گئی۔
ان کا کہنا ہے کہ بھارت نے پاکستان کی خود مختاری کی سنگین خلاف ورزی کی، معصوم شہریوں کو شہید کیا۔
سید عاصم منیر نے کہا کہ بھارتی خفیہ ایجنسی کی ٹرانس نیشنل دہشت گرد سرگرمیوں میں شمولیت عالمی سطح پر شدید تشویش کا باعث ہے۔
انہوں نے کہا کہ اس کی مثالیں کینیڈا میں سکھ رہنما کا قتل، قطر میں 8 بھارتی نیول افسران کا معاملہ ہے، اس کی مثال کلبھوشن جادھو جیسے واقعات بھی ہیں۔
آرمی چیف نے کہا کہ ڈیڑھ ماہ کے وقفے سے میرا دوسرا دورہ پاک امریکا تعلقات میں ایک نئی جہت کی علامت ہے، ان دوروں کا مقصد تعلقات کو تعمیری، پائیدار اور مثبت راستے پر گامزن کرنا ہے، امریکا میں مقیم پاکستانیوں سے خطاب میرے لیے اعزاز کی بات ہے۔
انہوں نے کہا کہ بیرونِ ملک مقیم پاکستانی عزت اور وقار کا سر چشمہ اور دیگر پاکستانیوں کی طرح پرجوش ہیں، بیرون ملک پاکستانی ’برین ڈرین نہیں بلکہ برین گین‘ ہیں، بیرون ملک مقیم پاکستانیوں کی وطن عزیز کے ساتھ عقیدت اور وابستگی ایک کھلی حقیقت ہے، ناگہانی آفات پر بھی بیرونِ ملک پاکستانی سب سے پہلے امداد کی اپیل پر لبیک کہتے ہیں۔
فیلڈ مارشل نے کہا کہ غزہ میں جاری نسل کشی بدترین انسانی المیہ ہے، غزہ کی صورتِ حال کے عالمی اور علاقائی دونوں سطح پر شدید مضمرات ہیں۔
سید عاصم منیر نے کہا کہ افغانستان سے فتنہ الخوارج سمیت کئی دہشت گرد تنظیمیں پاکستان کے خلاف متحرک ہیں، ہماری ترقی اور خوش حالی دنیا بھر میں بسنے والے پاکستانیوں سے وابستہ ہے، دہشت گردوں کے لیے کوئی ہمدردی نہیں، انہیں پوری قوت سے انصاف کا سامنا کرنا ہو گا، ملک دشمن عناصر سوشل میڈیا کو افراتفری پیدا کرنے کے لیے بھی استعمال کرتے ہیں، نئی نسل کی سوچ، تعلقات اور ترجیحات مختلف ہیں جنہیں سمجھنا وقت کی اہم ضرورت ہے۔
اپنے خطاب میں فیلڈ مارشل سید عاصم منیر نے قرآن پاک کی آیات کا حوالہ بھی دیا، فیلڈ مارشل نے آیت پڑھی ’اے ایمان والو، اگر کوئی فاسق تمہارے پاس کوئی خبر لے کر آئے توخوب تحقیق کر لیا کرو، تاکہ تم نادانی میں کسی کو نقصان نہ پہنچاؤ اور بعد میں اپنے کیے پر پشیمان نہ ہو۔‘
فیلڈ مارشل نے کہا کہ امریکا کے ساتھ ممکنہ تجارتی معاہدے کی بدولت بھاری سرمایہ کاری متوقع ہے، بین الاقوامی تعلقات کے محاذ پر بھی پاکستان نے نمایاں کامیابیاں حاصل کی ہیں، امریکا، سعودی عرب، یو اے ای اور چین کے ساتھ مختلف مفاہمتی یادداشتوں پر عمل درآمد جاری ہے۔
انہوں نے کہا کہ معاشی تعاون اور سرمایہ کاری کو فروغ دیں گے، ہماری 64 فیصد نوجوان آبادی بے پناہ صلاحیتوں سے بھرپور ہے، یہ نوجوان مستقبل کی تعمیر میں کلیدی کردار ادا کریں گے۔
فیلڈ مارشل نے مزید کہا کہ ہماری بھارت کے خلاف سفارتی اور سیکیورٹی میدان میں حالیہ کامیابی اللّٰہ تعالیٰ کی رحمت سے ممکن ہوئی، یہ کامیابی اجتماعی کوشش، سیاسی لیڈر شپ کی دور اندیشی اور بہادر افواج کی پیشہ ورانہ مہارت کا نتیجہ ہے۔
آرمی چیف نے یہ بھی کہا کہ اب سوال یہ نہیں کہ ’اگر‘ ہم اٹھیں گے، بلکہ سوال یہ ہے کہ ’کتنی جلدی اور کتنی قوت سے‘ ہم اٹھیں گے، آئیے ہم اپنے آباو اجداد کی میراث قائم رکھتے ہوئے نئے جذبے اور مقصد کے ساتھ آگے بڑھیں۔
