فرمان الہی
نماز کے اوقات
وزیراعلیٰ پنجاب مریم نواز نے کہا جاپان میں پاکستانیوں کو بھارت سے جنگ جیتنے کی مبارکباد قبول ہو، انکا کہنا تھا کہ پاکستان سے اچھی خبریں آنا شروع ہوگئی ہیں، مزید اچھی خبریں سننے کو ملیں گی۔
ٹوکیو میں پاکستانی کیمونٹی سے خطاب کرتے ہوئے مریم نواز نے کہا کہ معیشت کی بہتری میں اوورسیز پاکستانیوں کا بڑا حصہ ہے، چند ماہ پہلے منہگائی 38 فیصد تھی، ن لیگ کی حکومت میں 3 فیصد تک آگئی ہے۔
انھوں نے کہا کہ عنقریب پنجاب میں انفرااسٹرکچر جاپان کے معیار تک لے آئیں گے، پنجاب کے اسپتالوں میں دوائیں ملنا شروع ہوگئی ہیں، پنجاب میں دنیا کا سب سے بڑا صفائی کا منصوبہ ستھرا پنجاب شروع کیا ہے۔
مریم نواز نے کہا صوبے میں ڈیڑھ لاکھ لوگوں کو نوکریاں دی ہیں تاکہ پنجاب صاف ہو، جاپان سے صفائی اور ماحول کی بہتری کے لیے ٹیکنالوجی لیں گے، سڑکیں بنا کر نواز شریف نے ملک کی معیشت کو مضبوط بنایا۔
وزیراعلیٰ پنجاب کا کہنا تھا کہ آج پورے پاکستان سے لوگ پنجاب علاج کرانے آتے ہیں، جنوبی ایشیا کا سب سے بڑا کینسر اسپتال نواز شریف کینسر اسپتال بنا رہے ہیں۔
انھوں نے کہا شہباز شریف صبح سات بجے سے رات 12 بجے تک کام کر کے ملک کو مسائل سے نکال رہے ہیں، پانچ سال میں پانچ لاکھ گھر غریبوں کو بناکر دیں گے، دسمبر تک ایک لاکھ گھر مکمل ہوجائیں گے۔
مریم نواز نے کہا دسمبر تک پنجاب میں گیارہ سو الیکٹرک بسیں سڑکوں پر آجائیں گی جس کا کرایہ صرف 20 روپے ہوگا، پچاس ہزار تعلیمی اسکالر شپس اور ایک لاکھ لیپ ٹاپ مستحق بچوں کو دیں گے۔
