فرمان الہی
نماز کے اوقات
مسلم لیگ ن اوورسیز کے سابق جنرل سیکریٹری شیخ قیصر محمود نے کہا ہے کہ وزیرِ اعلیٰ پنجاب مریم نواز کی متحرک اور فعال شخصیت نے جاپان میں عوام اور حکومتی شخصیات کو بے حد متاثر کیا ہے۔
انہوں نے کہا ہے کہ مریم نواز روزانہ درجنوں ملاقاتیں کر رہی ہیں اور اپنی تمام تر توجہ پنجاب کی ترقی کے منصوبوں پر مرکوز رکھے ہوئے ہیں، ان کی یہ انتھک کاوشیں نہ صرف قابلِ ستائش ہیں بلکہ ایک نئے سیاسی اور سماجی رجحان کی بھی عکاس ہیں۔
شیخ قیصر محمود نے کہا ہے کہ مریم نواز کے اس دورۂ جاپان نے پاکستان کے مثبت اور نرم امیج کو اجاگر کیا ہے، جس سے جاپان میں مقیم پاکستانی کمیونٹی بھی فخر محسوس کر رہی ہے، وزیرِ اعلیٰ پنجاب کی شخصیت اور اندازِ گفتگو نے جاپانی سرمایہ کاروں اور حکومتی نمائندوں پر گہرا اثر ڈالا ہے اور اس سے دونوں ملکوں کے تعلقات میں مزید وسعت پیدا ہو رہی ہے۔
انہوں نے کہا کہ مریم نواز اس دورے کے دوران پنجاب کی ترقی کےلیے درجنوں منصوبوں پر بات کر رہی ہیں، جن میں صنعتی ترقی، تعلیم، صحت اور انفرااسٹرکچر کے منصوبے شامل ہیں، یہ اقدامات اس بات کا ثبوت ہیں کہ پنجاب حکومت غیر ملکی سرمایہ کاری کے ذریعے صوبے کو ترقی کے ایک نئے دور میں داخل کرنے کے لیے سنجیدہ کوششیں کر رہی ہے۔
شیخ قیصر محمود نے امید ظاہر کی کہ وزیرِ اعلیٰ پنجاب کا یہ دورہ ناصرف صوبے کے لیے معاشی فوائد کا باعث ہو گا بلکہ پاکستان اور جاپان کے تعلقات میں بھی ایک نیا سنگِ میل ثابت ہو گا۔
