فرمان الہی
نماز کے اوقات
کراچی میں ایم اے جناح روڈ پر پٹاخوں کے گودام کے مالک حنیف عرف پٹاخہ کو گرفتار کر لیا گیا ہے۔
پولیس حکام کا کہنا ہے کہ حنیف دھماکے میں زخمی ہو گیا تھا اور اسپتال میں زیر علاج ہے۔
حکام کا کہنا ہے کہ گودام کے مالک حنیف کا بیان قلمبند نہیں کیا جا سکا، حنیف کا بھائی ایوب گزشتہ رات اسپتال سے فرار ہوگیا، ملزم کی گرفتاری کے لیے چھاپوں کا سلسلہ جاری ہے، دونوں بھائی واقعے کی ایف آئی آر میں نامزد ہیں۔
پولیس حکام کا کہنا ہے کہ مقدمے میں قتل بالسبب، غفلت، لاپرواہی اور دیگر دفعات شامل ہیں، دھماکے کے نتیجے میں اب تک 6 افراد جاں بحق ہوچکے ہیں، عمارت سے 4 افراد کی لاشیں ملیں 2 زخمی اسپتال میں دم توڑ گئے تھے۔
جاں بحق افراد کی شناخت 16سالہ اسد، 40 سالہ نوید، 32 سالہ کاشف، 40 سالہ شہزاد علی کے نام سے ہوئی ہے، ایک شخص کی شناخت نہیں ہوسکی۔
خیال رہے کہ ایم اے جناح روڈ پر گزشتہ روز پٹاخوں کے گودام میں ہونے والے دھماکے کے بعد جائے وقوعہ پر شدید اشتعال پایا گیا اور آتشبازی کا سامان لے جانے والی گاڑی کو مشتعل عوام نے روک کر پتھراؤ کیا، گاڑی کے شیشے توڑ دیے اور نقصان پہنچایا، جس پر پولیس نفری نے موقع پر پہنچ کر حالات قابو میں کیے اور گاڑی کو تحویل میں لے لیا۔
