فرمان الہی
نماز کے اوقات
بھارتی کرکٹ ٹیم کے فاسٹ بولر محمد شامی شاندار کارکردگی کے باوجود مسلم کھلاڑی ہونے کے ناطے اکثر بھارت میں تنقید اور نفرت کا نشانہ بنتے رہتے ہیں، اِنہیں متعدد بار خود کو محب وطن ثابت کرنا پڑا ہے۔
یاد رہے کہ محمد شامی کو اُس وقت شدید تنقید کا سامنا کرنا پڑا تھا جب گزشتہ رمضان المبارک کے دوران ایک میچ میں اِنہیں انرجی ڈرنک پیتے ہوئے دکھایا گیا تھا۔
بھارتی میڈیا کو دیے گئے حالیہ انٹرویو کے دوران محمد شامی نے گزشتہ رمضان کے دوران میچ کے لیے روزہ چھوڑنے اور کھیل کے دوران انرجی ڈرنکس پینے پر پہلی بار کُھل کر بات کی ہے۔
ان کا کہنا تھا کہ ہم 42 یا 45 ڈگری کی گرمی میں میچ کھیل رہے ہوتے ہیں، اپنی جان خطرے میں ڈال رہے ہوتے ہیں، ہمارے مذہب میں بھی اس حوالے سے چھوٹ موجود ہے، اگر آپ سفر میں ہوں، ملک کی نمائندگی کر رہے ہوں یا ایسی صورتحال میں ہوں جہاں روزہ رکھنا ممکن نہ ہو تو اسلام روزہ چھوڑنے کی اجازت دیتا ہے۔
انہوں نے مزید کہا کہ لوگ یہ سمجھیں کہ کھلاڑی کیا کر رہا ہے اور کس مقصد کے لیے قربانی دے رہا ہے، بعد میں اس کی تلافی بھی کی جا سکتی ہے جو میں نے کی تھی۔
انٹرویو کے دوران محمد شامی نے اس بات پر بھی روشنی ڈالی کہ وہ سوشل میڈیا پر ملنے والی نفرت اور تنقید سے کس طرح نمٹتے ہیں۔
محمد شامی نے کہا کہ وہ سوشل میڈیا پر ہونے والی تنقید کو اب بالکل سنجیدہ نہیں لیتے کیونکہ ان کے تمام اکاؤنٹس ان کی ٹیم کے زیرِ انتظام ہیں، کچھ لوگ صرف شہرت حاصل کرنے کے لیے منفی تبصرے کرتے ہیں، میں کبھی کمنٹس نہیں پڑھتا، میری ٹیم ہی میرے اکاؤنٹس کو سنبھالتی ہے۔
بھارتی میڈیا کے مطابق ٹیم کے تجربہ کار فاسٹ بولر محمد شامی اس وقت تینوں فارمیٹس میں مستقل جگہ بنانے کے لیے جدوجہد کر رہے ہیں، انہیں ایشیا کپ 2025ء کے لیے بھی ٹیم میں شامل نہیں کیا گیا ہے۔
