فرمان الہی
نماز کے اوقات
وزیراعظم شہباز شریف نے کہا ہے کہ پاکستان کو بھارت کے ساتھ روس کے تعلقات پر مسئلہ نہیں، پاکستان بھی روس کے ساتھ بہترین تعلقات چاہتا ہے۔
چین کے دارالحکومت بیجنگ میں وزیرِ اعظم شہباز شریف اور روسی صدر پیوٹن کے درمیان ملاقات ہوئی ہے، اس موقع پر دونوں رہنماؤں نے گرم جوشی سے مصافحہ کیا۔
اس موقع پر صدر پیوٹن نے وزیرِ اعظم پاکستان شہباز شریف کو نومبر میں دورۂ روس کی دعوت دی۔
روس کے صدر ولادیمیر پیوٹن کا کہا کہ پاکستان کے ساتھ بہترین تعلقات ہیں، پاکستان کے ساتھ دو طرفہ تعلقات کا فروغ چاہتے ہیں۔
روسی صدر پیوٹن نے کہا کہ پاکستان کو قدرتی آفت کا سامنا ہے، پاکستان میں سیلاب سے ہونے والے نقصانات پر افسوس ہے۔
انہوں نے کہا کہ روس اور پاکستان کے درمیان تعلقات کے فروغ کو قدر کی نگاہ سے دیکھتے ہیں، امید ہے کہ پاکستان قدرتی آفات سے درپیش مشکلات کا کامیابی سے مقابلہ کرے گا۔
اس موقع پر وزیرِ اعظم شہباز شریف نے کہا کہ روس کے ساتھ دو طرفہ تجارت بڑھانا چاہتے ہیں، ہم درست سمت میں آگے بڑھ رہے ہیں، پاکستان اور روس زراعت، توانائی اور ٹرانسپورٹ میں تعاون بڑھانے کے پروٹول پر دستخط کر چکے ہیں۔
انہوں نے کہا کہ روس کے ساتھ مضبوط تعلقات کے خواہشمند ہیں، پاکستان روس کے ساتھ دو طرفہ تعلقات بڑھانے کا خواہاں ہے، روس اور پاکستان کے مختلف شعبوں میں بہت اچھے تعلقات رہے ہیں، روس کے ساتھ تجارتی روابط بھی بڑھانا چاہتے ہیں۔
وزیرِ اعظم شہباز شریف نے کہا کہ روس سے تعلقات کا فروغ چاہتے ہیں، روس سے تجارت سمیت مختلف شعبوں میں تعاون کے خواہشمند ہیں، روس کے ساتھ دو طرفہ تعلقات وقت کے ساتھ مضبوط ہو رہے ہیں، پاکستان خطے میں امن، ترقی اور خوش حالی کا فروغ چاہتا ہے۔
وزیرِ اعظم شہباز شریف اور روسی صدر ولادیمیر پیوٹن کی بیجنگ میں ملاقات کا اعلامیہ جاری کر دیا گیا جس میں کہا گیا ہے کہ دونوں رہنماؤں نے گزشتہ 1 سال کے دوران تعاون کو وسعت دینے پر اطمینان کا اظہار کیا۔
اعلامیے میں کہا گیا ہے کہ ملاقات میں اتفاق کیا گیا کہ دونوں ممالک کے درمیان تعلقات باہمی اعتماد، احترام اور گرمجوشی پر مبنی ہیں۔
اعلامیے کے مطابق ملاقات کے حوالے سے وزیرِ اعظم شہباز شریف نے کہا ے کہ پاکستان روس کے ساتھ اپنے تعلقات کو بہت اہمیت دیتا ہے۔
اعلامیے میں کہا گیا ہے کہ وزیرِ اعظم نے کہا کہ روس کے ساتھ تجارتی روابط، توانائی، زراعت ،سرمایہ کاری ، دفاع، مصنوعی ذہانت، تعلیم، ثقافت کے شعبوں میں تعلقات بڑھانا چاہتے ہیں۔
اعلامیے کے مطابق وزیرِ اعظم شہباز شریف نے کہا کہ مختلف عالمی پلیٹ فارمز پر دونوں ممالک کے نقطۂ نظر میں کافی حد تک مماثلت خوش آئند ہے۔
اعلامیے میں کہا گیا ہے کہ وزیر ِاعظم نے دونوں ممالک کے درمیان قائم ادارہ جاتی مکینزم کو مزید مضبوط بنانے پر زور دیا۔
اعلامیے کے مطابق وزیرِ اعظم شہباز شریف کا کہنا ہے کہ پاکستان اسٹیل مل کا فلیگ شپ پروجیکٹ پاکستان روس دوستی کی علامت ہو گا۔
