فرمان الہی
نماز کے اوقات
حکمران جماعت مسلم لیگ (ن) کے وفاقی وزیر حنیف عباسی نے ساتھی وزیر خواجہ محمد آصف پر نام لیے بغیر طنز کے تیر چلادیے ہیں۔
قومی اسمبلی اجلاس کے دوران حنیف عباسی نے کہا کہ ہمیں شوق ہوتا ہے کبھی بیوروکریسی کو گالی دیتے ہیں، کبھی سیاستدانوں اور کبھی اپنے ہی نظام کو ہائبرڈ کہہ دیتے ہیں۔
انہوں نے کہا کہ اگر نظام اتنا ہی گندا، لوگ اتنے ہی برے ہیں اور یہی کچھ کہنا ہے تو حکومت سے اٹھ کر اپوزیشن میں چلے جائیں۔
وفاقی وزیر نے مزید کہا کہ یہ کیسےممکن ہے کہ راولپنڈی میں تجاوزات ہیں اور میں کہوں اس میں قصوروار نہیں، آپ کہہ رہے ہیں نظام گندا ہے، آپ 40 سال اس نظام کا حصہ رہے ہیں۔
اُن کا کہنا تھا کہ پاکستان کی معیشت ہو یا دفاع ہو، یہ مضبوط ہاتھوں میں ہے، ہم اس ایوان کا تقدس خود پامال کرتے ہیں۔
حنیف عباسی نے یہ بھی کہا کہ اپنے وائرل ہونے کےلیے وزیراعظم اور وزیراعلیٰ کو ڈس کریڈٹ کرتے ہیں، یہ اپنے آدھا کلو گوشت کی خاطر پوری بھینس ذبح کرنے کی کوشش نہیں ہونی چاہیے۔
