فرمان الہی
نماز کے اوقات
بھارتی ریاست اتر پردیش کے شہر مین پوری میں خاتون کو دوپٹے سے گلا دبا کر قتل کر دیا گیا۔
بھارتی میڈیا کی رپورٹ کے مطابق شادی کرنے اور قرض واپس کرنے کا دباؤ ڈالنے پر 52 سالہ خاتون کو اس کے 26 سالہ دوست نے دوپٹے سے گلا دبا کر قتل کر دیا۔
پولیس کے مطابق 11 اگست کو مین پوری کے کرپاری گاؤں کے قریب ایک خاتون کی لاش ملی، اس کی گردن پر موجود نشانات دیکھ کر لگا کہ اسے قتل کیا گیا ہے اور پوسٹ مارٹم رپورٹ میں قتل کی تصدیق بھی ہوگئی۔
پولیس نے بتایا کہ ریاست کے کئی تھانوں سے رابطے کے بعد معلوم ہوا کہ خاتون فرخ آباد کی رہائشی تھی۔
پولیس نے خاتون کے قاتل ملزم ارون راجپوت کو گرفتار کرکے تفتیش کی تو اس نے اپنے بیان میں بتایا کہ اس کا خاتون سے رابطہ انسٹاگرام پر ہوا تھا اور دونوں کے درمیان ڈیڑھ سال سے دوستی تھی۔
ملزم نے اپنے بیان میں مزید بتایا کہ دو مہینے پہلے ہم ایک دوسرے سے فون پر باقاعدگی سے بات کرنے لگے پھر ہماری کئی بار ملاقاتیں بھی ہوئیں اور 11 اگست کو بھی مین پوری میں ملاقات ہوئی، خاتون کچھ عرصے سے مجھ پر شادی کے لیے دباؤ ڈال رہی تھی اور 11 اگست کو بھی اس نے یہی بات کی اور اس نے مجھے تقریباً 1.5 لاکھ روپے قرض بھی دیا تھا تو مجھ سے قرض بھی واپس مانگا جس پر میں نے غصے میں اسے قتل کر دیا۔
ملزم نے بیان میں بتایا کہ خاتون کم عمر نظر آنے کے لیے انسٹاگرام پر فلٹرز کا استعمال کرتی تھی جب ہماری پہلی بار ملاقات ہوئی تب مجھے اس کی اصل عمر معلوم ہوئی۔
ملزم نے بیان میں یہ بھی بتایا کہ خاتون شادی شدہ بھی تھی اور اس کے بچے بھی تھے، ان وجوہات کی وجہ سے میں اس سے شادی نہیں کرنا چاہتا تھا لیکن وہ مسلسل مجھ پر شادی کرنے کا دباؤ ڈال رہی تھی۔
