فرمان الہی
نماز کے اوقات
بھارتی ریاست کرناٹک کے شہر بنگلور میں خاتون کو زندہ جلادیا گیا۔
بھارتی میڈیا کے مطابق بنگلور میں 35 سالہ خاتون کو اس کے ساتھ رہنے والے شخص نے پیٹرول چھڑک کر آگ لگا دی، جو دوران علاج اسپتال میں دم توڑ گئی۔
پولیس کا کہنا ہے کہ ملزم وتل آن لائن ٹیکسی چلاتا تھا اور نشے کا عادی تھا، اس نے تین شادیاں کی تھیں، جو ناکام ہوچکی تھی، جبکہ مقتولہ ونجا کشی کی بھی دو شادیاں ناکام ہوچکی تھیں، دونوں 4 برس سے ساتھ رہ رہے تھے۔
تفتیشی حکام کا کہنا ہے کہ مقتولہ ونجا کشی حال ہی میں وِتل کی زیادتیوں اور شراب نوشی سے تنگ آ کر اُس سے الگ رہنے لگی تھی۔ اس دوران اُس کی دوستی ماری اپا نامی ایک شخص سے ہوگئی تھی۔
واقعے کے روز ونجا کشی، ماری اپّا اور ڈرائیور کے ساتھ آرہی تھی کہ ٹریفک سگنل پر وِتل نے اُن کی کار کو روک لیا۔ اُس نے گاڑی کے اندر پیٹرول پھینک دیا، جس سے ونجا کشی، ماری اپّا اور ڈرائیور پر پیٹرول جا گرا۔ باقی دونوں کسی طرح بچ نکلے، لیکن وِتل نے ونجاکشی کا پیچھا کیا، اُس پر مزید پیٹرول ڈالا اور لائٹر سے آگ لگا دی۔
عینی شاہدین کے مطابق ایک راہگیر نے بہادری کا مظاہرہ کرتے ہوئے کپڑے سے آگ بجھانے کی کوشش کی اور خاتون کو اسپتال منتقل کرنے میں مدد کی۔
اس دوران وہ خود بھی معمولی جھلس گیا۔ تاہم، ونجاکشی تقریباً 60 فیصد جھلس چکی تھی اور جانبر نہ ہو سکی۔
پولیس نے بتایا کہ ملزم وِتل بھی جھلسنے سے زخمی ہوا اور اُسے 24 گھنٹوں کے اندر گرفتار کر لیا گیا۔
