فرمان الہی
نماز کے اوقات
بھارتی ریاست مدھیہ پردیش کے ضلع انوپ پور میں 60 سالہ شخص کو تیسری بیوی نے قتل کروا دیا، جس کی لاش اس کی دوسری بیوی کو کنویں سے ملی۔
مقتول بھائی لال راجک کی لاش کنویں سے برآمد ہوئی ہے، جسے تیسری بیوی نے قتل کروایا، اس کی ذاتی زندگی پیچیدگیوں سے بھری ہوئی تھی۔
پولیس کے مطابق بھائی لال نے 3 شادیاں کی تھیں، پہلی بیوی اسے چھوڑ گئی، دوسری بیوی گڈی بائی کے ہاں اولاد نہیں ہوئی تو اس نے گڈی کی چھوٹی بہن منی عرف وملا سے تیسری شادی کر لی جس سے 2 بچے بھی ہوئے۔ لیکن اس رشتے کے پسِ پردہ ایک خطرناک راز چھپا ہوا تھا۔
تفتیشی حکام کا کہنا ہے کہ منی مقامی پراپرٹی ڈیلر نرائن داس عرف للو کے ساتھ ناجائز تعلق میں ملوث تھی۔
منی اور للو نے اپنے راستے سے بھائی لال کو ہٹانے کا منصوبہ بنایا اور ایک 25 سالہ مزدور دھیراج کول کو اس سازش میں شامل کیا۔
30 اگست کی رات جب بھائی لال اپنے زیرِ تعمیر مکان میں چارپائی پر سویا ہوا تھا تو للو اور دھیراج اندر گھس گئے اور لوہے کی سلاخ سے اس کے سر پر وار کر کے اسے موقع پر ہی ہلاک کر دیا۔
بعد ازاں لاش کو بوری اور کمبل میں لپیٹ کر رسی اور ساڑھیوں سے باندھا گیا اور کنویں میں پھینک دیا گیا۔
اگلی صبح مقتول کی دوسری بیوی گڈی بائی نے کنویں میں لاش تیرتی دیکھی تو پولیس کو اطلاع دی۔
پولیس نے کنواں خالی کروا کے لاش اور مقتول کا موبائل فون برآمد کیا، پوسٹ مارٹم میں تصدیق ہوئی کہ موت شدید چوٹوں کے باعث ہوئی تھی۔
حکام کا کہنا ہے کہ وہ معاملے کی تہہ تک 36 گھنٹے میں پہنچ گئے اور تینوں ملزمان منی عرف وملا، للو اور دھیراج کول کو گرفتار کر لیا گیا ہے۔
