فرمان الہی
نماز کے اوقات
اعلیٰ ثانوی تعلیمی بورڈ کراچی نے انٹرمیڈیٹ بارہویں جماعت کامرس پرائیویٹ گروپ کے سالانہ امتحانات برائے 2025ء کے نتائج کا اعلان کر دیا۔
چیئرمین انٹر بورڈ کراچی فقیر محمد لاکھو نے نتائج کا اعلان کرتے ہوئے بتایا ہے کہ کامرس پرائیویٹ گروپ کے امتحانات میں پہلی پوزیشن آمنہ جنید موتی بنتِ محمد جنید رول نمبر 51041 نے ٹوٹل 1100 میں سے 950 نمبرز اے ون گریڈ کے ساتھ حاصل کیے ہیں۔
کوکب بنتِ محمد امین رول نمبر 51035 نے 946 نمبرز اے ون گریڈ کے ساتھ دوسری پوزیشن جبکہ بلقیس بنتِ مجاہد رول نمبر 51132 نے 913 نمبرز اے ون گریڈ کے ساتھ تیسری پوزیشن حاصل کی ہے۔
ناظمِ امتحانات زرینہ راشد نے نتائج کی تفصیلات بتاتے ہوئے کہا ہے کہ کامرس پرائیویٹ گروپ کے امتحانات میں 1964 امیدواروں نے رجسٹریشن حاصل کی، 1871 امیدوار امتحانات میں شریک ہوئے جن میں سے 856 امیدوار کامیاب قرار پائے، اس طرح کامیابی کا تناسب 45.75 فیصد رہا۔
انہوں نے بتایا ہے کہ ان امتحانات میں 5 امیدوار اے ون گریڈ، 36 اے گریڈ، 118 بی گریڈ، 289 سی گریڈ، 370 ڈی گریڈ اور 34 امیدوار ای گریڈ میں کامیاب قرار پائے جبکہ 4 امیدوار پاس ہوئے ہیں۔
چیئرمین فقیر محمد لاکھو نے کامیاب ہونے والے طلبہ کو مبارک باد دیتے ہوئے کہا ہے کہ انٹربورڈ کراچی نے انٹرمیڈیٹ کے سالانہ امتحانات برائے 2025ء میں مختلف گروپس کے پوزیشن ہولڈرز طلبہ کے اعزاز میں تقریب منعقد کرنے کا سلسلہ شروع کردیا ہے، اس حوالے سے گزشتہ ہفتے سائنس پری انجینئرنگ گروپ کے پوزیشن ہولڈرز طلبہ کو تقریب میں میرٹ سرٹیفکیٹ دیے گئے ہیں جبکہ جلد دیگر گروپس کے پوزیشن ہولڈرز طلبہ کے اعزاز میں تقریب منعقد کر کے انہیں بھی میرٹ سرٹیفکیٹس دیے جائیں گے۔
نتائج بورڈ کی ویب سائٹ www.biek.edu.pk پر دیکھے جا سکتے ہیں۔
