فرمان الہی
نماز کے اوقات
وزیرِ اعظم شہباز شریف نے کہا ہے کہ پاکستان اور بنگلادیش کے درمیان دوطرفہ تعلقات مشترکہ تاریخ، ثقافتی روابط اور گہری وابستگیوں پر مبنی ہیں۔
وزیرِاعظم شہباز شریف سے بنگلادیش کے مشیر برائے مذہبی امور اے ایف ایم خالد حسین نے وفد سمیت ملاقات کی۔
ملاقات کے دوران پاکستان میں بنگلادیش کے ہائی کمشنر محمد اقبال حسین خان بھی موجود تھے۔
وزیرِ اعظم شہباز شریف نے ڈاکٹر حسین اور ان کے وفد کا خیرمقدم کیا اور دونوں ممالک کے درمیان تعلقات کے مزید فروغ کی ضرورت پر زور دیا۔
ملاقات میں پاکستان بنگلادیش براہِ راست پروازوں کی جلد بحالی کے امکانات، پاکستان بنگلادیش تعلقات کی موجودہ رفتار برقرار رکھنے کے لیے اعلیٰ سطح کے دوروں پر اتفاق کیا گیا۔
وزیرِاعظم شہبازشریف نے چیف ایڈوائزر بنگلادیش کو دورہ پاکستان کی دعوت کا اعادہ کیا۔
بنگلادیشی مشیر نے بھی وزیرِ اعظم کو حکومت کی جانب سے بنگلادیش کے دورے کی دعوت دی۔
ڈاکٹر حسین نے چیف ایڈوائزر پروفیسر محمد یونس کا ایک خط بھی وزیرِاعظم کے سپرد کیا، خط میں پاکستان میں سیلاب سے جانی اور مالی نقصان پر تعزیت کا اظہار اور امداد کی پیشکش کی گئی تھی۔
ڈاکٹر خالد حسین نے اپنے خیرمقدم پر وزیرِاعظم شہباز شریف کا شکریہ ادا کیا۔
دوسری جانب ڈاکٹر خالد حسین نے کہا کہ پاکستان اور بنگلادیش کے درمیان برادرانہ تعلقات تاریخی روابط اور مشترکہ عقیدے سے جڑے ہیں۔
