فرمان الہی
نماز کے اوقات
ٹی ٹوئنٹی ایشیاء کپ 2025 کے تیسرے میچ میں بنگلادیش نے کپتان لٹن داس کی نصف سنچری اور بولرز کی نپی تلی بولنگ کی بدولت ہانگ کانگ کو 7 وکٹوں سے شکست دے دی۔
ابوظبی کے زاید کرکٹ اسٹیڈیم میں کھیلے گئے اے سی سی مینز ٹی ٹوئنٹی ایشیاء کپ 2025ء کے میچ میں ہانگ کانگ نے پہلے بیٹنگ کرتے ہوئے 144 رنز کا ہدف دیا، جسے بنگال ٹاٹیگرز نے 14 گیندوں قبل 3 وکٹوں کے نقصان پر پورا کر لیا۔
اننگز کے نمایاں بلے باز ان کے کپتان لٹن داس رہے، جنہوں نے 39 گیندوں پر 6 چوکوں اور 1 چھکے کی مدد سے 59 رنز کی اننگز کھیلی۔
داس کا ساتھ توحید ہردوئے نے دیا، جو 36 گیندوں پر ناقابلِ شکست 35 رنز کے ساتھ نمایاں ثابت ہوئے۔
دونوں بلے بازوں نے تیسری وکٹ کے لیے 95 رنز کی شاندار شراکت قائم کی، جو داس کے آؤٹ ہونے کے ساتھ اختتام پزیر ہوئی، وہ 18ویں اوور کی پہلی گیند پر پویلین لوٹے، اس وقت بنگلادیش کو فتح کےلیے صرف 2 رنز درکار تھے۔
ہانگ کانگ کی جانب سے عتیق اقبال سب سے کامیاب گیند باز رہے، جنہوں نے 3.4 اوورز میں 14 رنز کے عوض 2 وکٹیں حاصل کیں، جبکہ آیوش شکلا نے ایک کھلاڑی کو آؤٹ کیا۔
اس سے قبل بنگلا دیش کے کپتان لٹن داس کا پہلے فیلڈنگ کا فیصلہ سودمند رہا، کیونکہ ان کے گیند بازوں نے ہانگ کانگ کو مقررہ 20 اوورز میں 7 وکٹوں کے نقصان پر 143 رنز تک محدود کر دیا۔
بنگلا دیش کی جانب سے تنظیم حسن ثاقب، تسکین احمد اور رشاد حسین نے دو، دو وکٹیں حاصل کیں۔
