فرمان الہی
نماز کے اوقات
برطانیہ میں پاکستان کے ہائی کمشنر ڈاکٹر محمد فیصل نے کہا ہے کہ پاکستان نے اپنی دفاعی ٹیکنالوجی اور عسکری صلاحیتیں مقامی طور پر تیار کی ہیں، جس کا عملی مظاہرہ دنیا نے آپریشن بنیان مرصوص کے دوران دیکھا۔ ہمیں اپنی مسلح افواج کے پیشہ ورانہ مہارت اور اعلیٰ معیار پر فخر ہے۔
ان خیالات کا اظہار انہوں نے لندن میں جاری ڈیفنس اینڈ سیکیورٹی ایکوپمنٹ انٹرنیشنل (DSEI-2025) نمائش میں قائم پاکستان پویلین کے دورے کے دوران کیا۔
ڈاکٹر محمد فیصل نے مختلف اسٹالز کا معائنہ کیا اور پاکستان کی دفاعی صنعتوں کی نمائندگی کرنے والے حکام سے ملاقات کی۔
اس موقع پر ڈائریکٹر جنرل جوائنٹ اسٹاف اور ڈائریکٹر جنرل ڈیفنس ایکسپورٹ پروموشن آرگنائزیشن بھی موجود تھے۔
ڈیفنس اینڈ سیکیورٹی ایکوپمنٹ انٹرنیشنل نمائش میں پاکستانی پویلین توجہ کا مرکز بنا رہا۔
خیال رہے کہ لیفٹیننٹ جنرل تبسم حبیب، ڈائریکٹر جنرل جوائنٹ اسٹاف، ڈیفنس اینڈ سیکیورٹی ایکوپمنٹ انٹرنیشنل میں پاکستان کے وفد کی قیادت کر رہے ہیں۔
نمائش میں 90 سے زائد ممالک، 3300 عالمی شخصیات اور وفود، 460 سے زیادہ اعلیٰ فوجی افسران، 1600 سے زائد نمائش کنندگان اور تقریباً 45 ہزار شرکاء ایک ہی چھت کے نیچے جمع ہوئے ہیں۔
ہیوی انڈسٹری ٹیکسلا، پاکستان آرڈننس فیکٹری واہ اور نیشنل ریڈیو اینڈ ٹیلی کمیونیکیشن کارپوریشن اس نمائش میں اپنے دفاعی آلات کی نمائش کر رہے ہیں۔
عالمی دفاعی نمائش میں کئی غیر ملکی کمپنیوں نے پاکستان میں تیار کردہ دفاعی مصنوعات اور ٹیکنالوجیز خریدنے میں گہری دلچسپی کا اظہار کیا ہے۔
