فرمان الہی
نماز کے اوقات
وزیراعلیٰ پنجاب مریم نواز کا کہنا ہے کہ اڈیالہ جیل میں بیٹھے شخص کو یہ نہیں پتہ کہ باہر دنیا بدل چکی ہے، اب وہ قصہ پارینہ بن چکا اور پاکستان آگے بڑھ گیا۔
سرگودھا میں ماحول دوست الیکٹرک بسوں کی افتتاحی تقریب سے خطاب کرتے ہوئے وزیراعلیٰ پنجاب نے کہا کہ وہ ادھر جیل سے بیٹھ کر روز سوشل میڈیا پر بیان داغ دیتا ہے، وہ سمجھ رہا ہے کہ سوشل میڈیا پر اس کے بیان سے پاکستان میں ہلچل مچ جائے گی، اس کے دماغ سے یہ خلل نہیں جاتا وہ اندر بیٹھا ہے۔
مریم نواز نے کہا کہ پاکستان اور عوام ترقی کے نئے سفر کا آغاز کرچکے، باتیں ہوتی تھیں کہ پاکستان ڈیفالٹ کر جائے گا، اب نواز شریف کا دور آیا تو روز ایک خوشخبری آتی ہے۔
مریم نواز کا کہنا تھا کہ آج خبر آتی ہے کہ اسٹاک مارکیٹ نے ریکارڈ توڑ دیے، دنیا کے ادارے کہہ رہے ہیں کہ پاکستان کی معیشت بہتر ہو رہی ہے، وزیراعظم شہباز شریف کا جہاز جب سعودی فضا میں داخل ہوا تو سعودی جہازوں نے سلامی دی۔
انہوں نے کہا کہ جنگی جہازوں کی سلامی ہمارے ملک ہمارے پاکستان کی عزت ہے۔ ایک وزیراعظم ہوا کرتا تھا جسے الٹی سیدھی حرکتوں پر جہاز سے اتارا گیا۔
ان کا کہنا تھا کہ پاکستان اور سعودی عرب کے درمیان دفاعی معاہدہ بہت بڑا کارنامہ ہے، شہباز شریف کو سعودی دھرتی پر وہ عزت ملی کہ دنیا دیکھتی رہ گئی۔
مریم نواز نے کہا کہ حرمین شریفین کی پاسبانی کا شرف پاکستان کو ملا ہے، کبھی دیکھی اتنی بڑی سفارتی کامیابی؟ ولی عہد شہزادہ محمد بن سلمان کو خراج تحسین پیش کرتے ہیں۔
وزیراعلیٰ پنجاب نے کہا کہ سرگودھا والو! آپ کو الیکٹرک بس کا تحفہ بہت مبارک ہو، آج سرگودھا کے لیے 33 بسوں کا تحفہ لائی ہوں، سرگودھا شہر کے لیے 60 بسیں رکھی ہیں۔
انہوں نے کہا کہ سرگودھا ڈویژن کو 105 بسوں کا تحفہ دیں گے، سرگودھا شاہینوں کا شہر ہے، شاہینوں کے ساتھ ساتھ سرگودھا شیروں کا شہر ہے، شاہینوں نے قوم کا سر فخر سے بلند کیا۔
ان کا کہنا تھا کہ نواز شریف اور شہباز شریف نے سرگودھا کو ایسے پروجیکٹس دیے جس سے اس کی قسمت بدل گئی۔ سرگودھا کو جب سے موٹروے سے جوڑا گیا اس روز سے سرگودھا کی شکل بدلنی شروع ہوئی، حیرانی ہوئی کہ پورے سرگودھا ڈویژن میں دل کے امراض کا کوئی اسپتال نہیں، میں نے اسی روز فیصلہ کیا اور سرگودھا میں نواز شریف انسٹی ٹیوٹ آف کارڈیولوجی پر کام شروع کرانے کا فیصلہ کیا۔
مریم نواز نے کہا کہ سیلاب میں جن کے گھر گرے انہیں 10 لاکھ روپے ملیں گے، 2 ہفتوں کے اندر اندر سیلاب متاثرین کو چیک ملنا شروع ہو جائیں گے، آج روٹی 10 اور 15 روپے میں دستیاب ہے، پوری کوشش کرتی ہوں کہ گندم کی قیمت نہ بڑھے۔
