فرمان الہی
نماز کے اوقات
بھارت میں ہندو انتہا پسند تنظیم شیو سینا کے رہنما سنجے رت نے مودی سرکار پر تنقید کرتے ہوئے کہا ہے کہ محسن نقوی سےٹرافی نہ لینا سب ڈھونگ ہے۔
شیو سینا کے رہنما نے کہا کہ 10دن پہلے پوری بھارتی ٹیم نے محسن نقوی سے ہاتھ ملایا، آپ کہتےہیں ٹرافی کو ہاتھ نہیں لگائیں گے، ان کے ہاتھ سے نہیں لیں گے، کپتان سے ہاتھ نہیں ملائیں گے۔
سنجے رت نے کہا کہ ایسا ہے تو پھر آپ ایک ساتھ میدان میں کھیلتے کیوں ہیں، اگر آپ ایک ساتھ کھیلتے ہیں تو یہ نوٹنکی نہ کریں۔
دوسری جانب ایشیا کپ کی جیت کو آپریشن سندور سے جوڑنے پر بھارتی اپوزیشن جماعت کانگریس نے مودی کو آڑے ہاتھوں لے لیا۔
اپوزیشن جماعت کانگریس نے کھیل کو جنگی بیانیے سے ملانا ناقابلِ قبول قرار دے دیا۔
کانگریس رہنما اتل پٹیل نے سوال اٹھایا کہ کیا مودی کو خارجہ پالیسی اور سفارت کاری کی کوئی سمجھ ہے؟ اگر میچ کھیلا تو کھیل کی روح کے ساتھ کھیلنا چاہیے تھا، نہ کہ اسے جنگی پروپیگنڈے میں بدل دیں۔
واضح رہے کہ گزشتہ روز دبئی میں کھیلے گئے ایشیا کپ کے فائنل میں بھارت نے سنسنی خیز مقابلے کے بعد پاکستان کو آخری اوور میں 5 وکٹوں سے شکست دی۔
ٹورنامنٹ جیتنے کے باوجود بھارتی ٹیم کی ہٹ دھرمی برقرار رہی اور انہوں نے چیئرمین ایشین کرکٹ کونسل محسن نقوی سے ٹرافی لینے سے انکار کیا تاہم محسن نقوی بھی ڈٹ گئے جس پر بھارتی ٹیم کو ٹرافی کے بغیر ہی مایوس ہو کر گراؤنڈ سے باہر جانا پڑا۔
