فرمان الہی
نماز کے اوقات
کوئٹہ میں پشین اسٹاپ کے قریب خودکش دھماکے میں 2 ایف سی کے جوانوں سمیت 11 افراد شہید ہو گئے۔
صوبائی وزیرِ صحت بخت محمد کاکڑ نے ٹراما سینٹر میں میڈیا سے گفتگو کرتے ہوئے بتایا کہ دھماکے میں 11 افراد شہید ہوئے ہیں جن میں ایف سی کے 2 جوان بھی شامل ہیں جبکہ دھماکے میں 26 افراد زخمی ہوئے جو سول اسپتال اور ٹراما سینٹر میں زیرِ علاج ہیں، ان میں سے متعدد کی حالت تشویشناک ہے۔
ذرائع کے مطابق زرغون روڈ پشین اسٹاپ کے قریب دھماکے کے بعد فائرنگ کی آوازیں بھی سنی گئیں۔
صوبائی وزیر کا کہنا ہے کہ حملے میں ہماری فورسز نے جواں مردی سے دہشت گردوں کا مقابلہ کیا اور فورسز نے 6 دہشت گردوں کو جہنم واصل کیا۔
پولیس کے مطابق حالی روڈ کے قریب پشین اسٹاپ پر دھماکے کی اطلاع ملتے ہی فورسز اور ریسکیو اہلکار موقع پر پہنچ گئے، جہاں سے لاشوں اور زخمیوں کو اسپتال منتقل کیا گیا جب کہ دھماکے کے بعد فائرنگ کی آوازیں بھی سنی گئی تھیں۔
سیکیورٹی ذرائع کا کہنا ہے کہ حملہ آور ایف سی کی وردی میں ملبوس تھے، سب مارے گئے ہیں۔
وزیرِ صحت بخت محمد کاکڑ اور سیکریٹری مجیب الرحمٰن کی ہدایت پر ایمرجنسی نافذ کی گئی۔
ترجمان محکمۂ صحت کے مطابق کوئٹہ میں دھماکے کے بعد اسپتالوں میں ایمرجنسی نافذ کر دی گئی۔
سول اسپتال، بی ایم سی اسپتال اور ٹراما سینٹر میں ایمرجنسی نافذ کر دی گئی ہے۔
انہوں نے کہا کہ تمام کنسلٹنٹس، ڈاکٹرز، فارماسسٹس، اسٹاف نرسز پیرامیڈیکل اسٹاف اسپتالوں میں طلب کیا گیا ہے۔
گورنر بلوچستان جعفر خان مندوخیل نے پشین اسٹاپ کے قریب دہشت گرد حملے کی شدید الفاظ میں مذمت کی ہے جبکہ نہتے شہریوں کی شہادت اور ان کے زخمی ہونے پر گہرے رنج و دکھ کا اظہار کیا ہے۔
گورنر نے ہدایت کی کہ فوری طور پر تمام زخمیوں کو تمام طبی سہولتیں فراہم کی جائے۔
وزیرِ اعلیٰ بلوچستان کی کوئٹہ دھماکے کی مذمت
وزیرِ اعلیٰ بلوچستان میر سرفراز بگٹی نے کوئٹہ دھماکے کی شدید مذمت کرتے ہوئے کہا ہے کہ واقعے کے بعد سیکیورٹی فورسز نے فوری اور مؤثر ردعمل دیتے ہوئے 4 دہشت گردوں کو جہنم واصل کر دیا ہے۔
ان کا کہنا ہے کہ دہشت گرد بزدلانہ کارروائیوں سے قوم کا حوصلہ پست نہیں کر سکتے، عوام اور سیکیورٹی اداروں کی قربانیاں رائیگاں نہیں جائیں گی، بلوچستان کو پُرامن اور محفوظ بنانے کے عزم پر کاربند ہیں۔
وزیرِ اعلیٰ بلوچستان نے شہداء کے خاندانوں سے اظہار یک جہتی کیا اور ان کے لیے بلندیٔ درجات کی دعا کی۔
وزیرِ اعلی بلوچستان نے دھماکے کے زخمیوں کی جلد صحت یابی کے لیے بھی دعا کی۔
