فرمان الہی
نماز کے اوقات
پاکستانی ڈرامہ و فلم انڈسٹری کی معروف اداکارہ ثناء جاوید نے اپنے نام سے منسوب تصدیق شدہ فیس بُک پیچ کو جعلی قرار دے دیا۔
فوٹوز اینڈ ویڈیوز شیئرنگ پلیٹ فارم انسٹاگرام پر اسٹوری شیئر کرتے ہوئے انہوں نے جعلی تصدیق شدہ فیس بُک پیچ کے اسکرین شاٹس شیئر کرتے ہوئے فالوورز کو خبردار کیا ہے۔
اس کے ساتھ ہی انہوں نے ایک اور انسٹا اسٹوری شیئر کرتے ہوئے اپنے آفیشل فیس بک پیج کے بارے میں بھی بتایا۔ ان کا آفیشل فیس بُک پیج غیر تصدیق شدہ ہے۔
اداکارہ ثناء جاوید کے نام سے منسوب جعلی تصدیق شدہ فیس بُک پیج اُن کا نام اور تصویر استعمال کررہا ہے جہاں فالوورز کی تعداد 17 لاکھ سے زائد ہے جو حقیقی آفیشل پیج سے زیادہ ہیں۔
ثناء جاوید کے آفیشل فیس بُک پیچ پر فالوورز کی تعداد 12 لاکھ سے زائد ہے۔
اداکارہ نے اپنی انسٹا اسٹوری میں لکھا کہ الرٹ، یہ ایک جعلی پیج ہے اور مجھے نہیں معلوم کہ اس کی تصدیق کیسے ہوئی۔
انہوں نے مزید لکھا کہ براہ کرم اس اکاؤنٹ سے کسی بھی قسم کے بیانات یا مواد کو شیئر کرنے سے گریز کریں۔ میں نے پہلے ہی اسے رپورٹ کردیا ہے، جلد ہی اس فراڈ پیج کے خلاف مناسب کارروائی کی جائے گی۔
انہوں نے یہ بھی واضح کیا ہے کہ میں جعلی پیج پر پوسٹ کی جانے والی کسی بھی چیز کو کنٹرول یا سپورٹ نہیں کرتی ہوں اور اپنے فالوورز سے ہوشیار رہنے کی درخواست کرتی ہوں۔
