فرمان الہی
نماز کے اوقات
بھارت میں ہندو انتہا پسند تنظیم ہندو مہا سبھا کی خاتون رہنما پوجا شکون پانڈے نے اپنے ساتھ افیئرز کے بعد معروف بزنس مین کو لاکھوں روپے سپاری دے کر قتل کروادیا، پولیس نے ملزمہ کی تلاش شروع کردی۔
پوجا شکون پانڈے کو 2019 میں مہاتما گاندھی کے قتل کی ڈرامائی عکاسی کی ویڈیو وائرل کرنے کے بعد گرفتار کیا گیا تھا، ویڈیو میں انہوں نے پستول سے مہاتما گاندھی کے مجسمے کو گولی ماری تھی اور انہیں قتل کرنے والے شخص ناتھو رام گوڈسے کے مجسمے کو ہار پہنائے تھے، تاہم اب ملزمہ بزنس مین کے قتل کے الزام میں مطلوب ہیں، جن کی گرفتاری کیلئے چھاپے مارے جارہے ہیں۔
بھارتی میڈیا کے مطابق 23 ستمبر کو 30 سالہ تاجر ابھیشیک گپتا کو فائرنگ کرکے قتل کیا گیا تھا، پولیس کے مطابق اس قتل کی منصوبہ بندی پوجا شکون پانڈے اور ان کے شوہر نے کی تھی اور شوٹروں کو 3 لاکھ روپے کی سپاری دی گئی تھی۔
اس حوالے سے ابھیشیک کے والد نیرج گپتا نے سنگین الزام لگاتے ہوئے دعویٰ کیا کہ ان کے بیٹے کے پوجا شکون پانڈے کے ساتھ تعلقات تھے، جب ابھیشیک نے اس تعلق سے کنارہ کشی اختیار کی تو پوجا نے انتقاماً قتل کی سازش رچائی۔
پولیس نے ہندو مہا سبھا کی رہنما ملزمہ پوجا کے شوہر اشوک پانڈے کو گرفتار کر لیا ہے جبکہ مختلف ٹیمیں پوجا شکون پانڈے کی تلاش کر رہی ہیں۔
پولیس نے واقعے میں ملوث ایک ملزم کو گرفتار کر لیا ہے جس نے بیان دیا کہ قتل پوجا شکون پانڈے اور اشوک پانڈے کی ایماء پر ہوا۔ اس نے بتایا کہ ابتدائی طور پر ایک لاکھ روپے بطور ایڈوانس دیے گئے تھے اور باقی رقم قتل کے بعد ملنی تھی۔
پولیس کا کہنا ہے کہ سی سی ٹی وی فوٹیج اور دیگر شواہد کی بنیاد پر تحقیقات جاری ہیں اور جلد مزید گرفتاریوں کی توقع ہے۔
