فرمان الہی
نماز کے اوقات
بالی ووڈ اداکار اکشے کمار نے افسوسناک واقعہ شیئر کیا ہے جب چند ماہ قبل ان کی بیٹی سے آن لائن ویڈیو گیم کھیلتے وقت ایک اجنبی نے نازیبا تصاویر بھیجنے کو کہا۔
اکشے کمار نے مہاراشٹر کے وزیرِاعلیٰ سے اپیل کی کہ ساتویں سے دسویں جماعت کے طلبہ کے لیے ہر ہفتے ایک ’سائبر پیریڈ‘ لازمی رکھا جائے۔
اداکار نے اپنی ذاتی زندگی کے ایک تکلیف دہ واقعے کا ذکر کرتے ہوئے بتایا کہ سائبر کرائم کس تیزی سے بڑھ رہا ہے اور اب یہ روایتی گلی محلّے کے جرائم سے زیادہ خطرناک ہو چکا ہے۔
ممبئی میں ریاستی پولیس ہیڈکوارٹرز میں ’سائبر آگاہی ماہ 2025ء‘ کی افتتاحی تقریب کے دوران اکشے کمار نے اپنی بیٹی سے جڑا یہ حیران کن واقعہ سناتے ہوئے بتایا کہ چند ماہ پہلے میری بیٹی ایک آن لائن ویڈیو گیم کھیل رہی تھی جب ایک اجنبی نے اسے پیغام بھیجا اور اس سے معلوم کیا کہ آپ میل ہیں یا فی میل؟ جس پر بیٹی نے جواب دیا ’فی میل‘ تو فوراً اس اجنبی نے نازیبا تصاویر مانگ لیں، جس کے بعد میری بیٹی نے فوراً گیم بند کر دیا اور اپنی والدہ کو اطلاع دی، یہ واقعہ میرے لیے ایک کڑا سبق ثابت ہوا ہے۔
اکشے کمار نے زور دیا کہ یہ سب سائبر کرائم کی شروعات ہیں اور بچوں کو لازمی طور پر یہ سکھایا جانا چاہیے کہ وہ اپنے آپ کو آن لائن خطرات اور درندہ صفت افراد سے کیسے بچا سکتے ہیں، اسکولوں میں ’سائبر پیریڈ‘ بچوں کو ڈیجیٹل دنیا میں محفوظ رہنے کا علم فراہم کرے گا۔
اداکار نے کہا کہ میں وزیرِاعلیٰ سے گزارش کرتا ہوں کہ مہاراشٹر کے اسکولوں میں ہر ہفتے ساتویں، آٹھویں، نویں اور دسویں جماعت میں ایک سائبر پیریڈ لازمی ہونا چاہیے۔
واضح رہے کہ اکشے کمار کو حال ہی میں فلم ’جولی ایل ایل بی 3‘ میں دیکھا گیا جس میں ارشد وارثی، ہما قریشی، امریتا راؤ، سوربھ شکلا، گجیندرا راؤ، رام کپور اور دیگر نےبھی اداکاری کے جوہر دکھائے ہیں۔
اس وقت اکشے ڈائریکٹر پریا درشن کی ایکشن تھرلر ’حیوان‘ کی شوٹنگ کر رہے ہیں، جس میں سیف علی خان، سَیامی کھر اور دیگر اداکار بھی اہم کرداروں میں نظر آئیں گے۔
