فرمان الہی
نماز کے اوقات
گنبد نما چھت نہ صرف تعمیرات کو خوبصورتی اور آرکیٹیکچرل گہرائی بخشتی ہے بلکہ جس جگہ گنبد تعمیر کیا جائے یہ اس جگہ یا کمرے کو کشادہ اور بڑا بھی بنادیتی ہے۔ جس گھر میں بھی گنبد تعمیر کیا جائے، وہ گھر دور دور سے لوگوں کی توجہ کا مرکز بن جاتا ہے۔ اگر آپ اپنے گھر کی تعمیر میں گنبد کو شامل کرنا چاہتے ہیں تو آپ کو درج ذیل چیزوں کو زیرِ غور رکھنا ہوگا۔
گھر کی تعمیر میں گنبد کو شامل کرنا
تعمیراتی ماہرین کا کہنا ہے کہ گنبد نماچھت، فطری لحاظ سے کلاسیکی خصوصیات کی حامل ہوتی ہے جبکہ اس کا ڈیزائن متناسب ہوتا ہے۔ متناسب سے مراد یہ ہے کہ گنبد نما چھت چاروں اطرف سے ایک ہی حجم کی حامل ہوتی ہے۔ ’’اگر آپ متناسب تعمیرات پسند کرتے ہیں تو گنبد نما چھت آپ ہی کے لیے ہے‘‘، ماہرین کہتے ہیں۔
شکاگو میں کام کرنے والی آرکیٹیکٹ گیریٹ ایکین کہتی ہیں، ’’گنبد نما چھت کا ایک بڑا فائدہ یہ بھی ہوتا ہے کہ اس میں آپ کو گھر میں قدرتی روشنی داخل کرنے کے بے پناہ مواقع دستیاب ہوتے ہیں۔ گنبد نما چھت نہ صرف ایک عملی انتخاب ثابت ہوتی ہے بلکہ یہ قدرتی روشنی کو گھر میں داخل کرکے اسے جمالیاتی حسن بھی بخشتی ہے‘‘۔
گھروں میں عمومی طور پر گنبد نما چھت کے لیے داخلی ہال، لیونگ روم اور ڈائننگ ایریا کا انتخاب کیا جاتا ہے، تاہم ماہرین کہتے ہیں کہ آپ اپنے ذوق کے مطابق، جہاں چاہیں گنبد نما چھت تعمیر کرواسکتے ہیں۔ کئی لوگ گنبد نما چھت کے لیے لائبریری روم اور ماسٹر بیڈ روم کا بھی انتخاب کرتے ہیں۔
گیریٹ ایکین کہتی ہیں کہ جب آپ اپنے گھر کے داخلی ہال کے لیےگنبد نما چھت کا انتخاب کرتے ہیں تو اس وقت یہ بات ذہن نشین رکھیں کہ آپ کس طرح کا تاثر قائم کرنے کی کوشش کررہے ہیں۔ ’’میرے خیال میں داخلی ہال میں گنبد نما چھت ٹرینڈی اور جدت پسندی کا تاثر قائم کرتی ہے۔
آپ کو اپنے گھر کے مجموعی ڈیزائن کو مدِنظر رکھتے ہوئے فیصلہ کرنا ہوتا ہے کہ آپ گنبد نما چھت گھر کے کس حصے میں چاہتے ہیں۔ غلط جگہ کا انتخاب یہ تاثر دیتا ہے کہ آپ صرف دِکھاوے کے لیے گنبد نما چھت چاہتے ہیں، جوکہ ایک اچھا تاثر نہیں ہے‘‘۔
گنبد نما چھت تعمیراتی مرحلے میں زیادہ منصوبہ بندی مانگتی ہے اور اسے تعمیر کرنے کے لیے بھی آپ کو انتہائی ماہر کاریگروں کی ضرورت ہوگی۔ ’’اس سلسلے میں میرا مشورہ یہ ہوگا کہ اگر آپ گنبد نما چھت تعمیر کروانا چاہتے ہیں تو سب سے پہلے کسی ماہر کاریگر کو تلاش کریں، اور اس کے بعد اسے کہیں کہ اس سے قبل اس نے جو گنبد نما چھت یا چھتیں تعمیر کی ہیں، وہ بھی آپ کو دِکھائے۔ آپ کو ہر لحاظ سے اس بات کی تسلی ہونی چاہیے کہ آپ نے بالکل درست کاریگر اور ماہر ٹھیکیدار کا انتخاب کیا ہے‘‘، گیریٹ ایکین کہتی ہیں۔
نارتھ ہیمپٹن میں کام کرنے والی تعمیراتی کمپنی ساؤتھ وِک کنسٹرکشن کے سربراہ ٹیری ساؤتھ وِک کہتی ہیں، ’’گنبد نما یا گول چھت ایک ایسا تعمیراتی نمونہ ہے جو آپ کے تعمیراتی منصوبے یا گھر کو دیگر سے نمایاں کرتا ہے‘‘۔
گنبد نما چھت کے رنگ و روغن کے حوالے سے وہ کہتی ہیں، ’’گنبد کی چھت کو آپ ہلکا یا سفید رنگ کرسکتے ہیں، یا پھر اسے آپ آسمان کے رنگ جیسا پینٹ کردیں، مزید برآں گھر کی آرائش کے مطابق اسے آپ مزید فیچرز بھی دے سکتے ہیں‘‘۔
گنبد نما چھت کو مزید نمایاں کرنے کے لیے آپ اس کے احاطے کو LEDلائٹنگ سے سجا سکتے ہیں، یہ آپ کے گھر کو کلاسیکی رنگ دینے کا کام کرے گی۔ ’’یہ بات ٹھیک ہے کہ اس سے آپ کے منصوبے کی لاگت کچھ بڑھ جائے گی، کیونکہ یہ ایک خاص فیچر ہے، تاہم اگر آپ درست ٹھیکیدار کا انتخاب کرلیں تو مناسب پیسوں میں آپ کا اچھا کام ہوجائے گا‘‘، وہ کہتی ہیں۔
ڈوم سِیلنگ کِٹس
گنبد کے اندرونی حصے کو دلکش بنانے کے لیے اب مارکیٹ میں ’ڈوم سِیلنگ کِٹس‘ بھی آچکی ہیں، جنھیں اپنی ضرورت کے مطابق کاٹ کراور پینٹ کرکے استعمال کیا جاسکتا ہے۔ ان کِٹس کو آپ اپنی ضرورت اور حجم کے مطابق کاٹ کر فریم بناسکتے ہیں اور کمرے کو ایک زبردست تشخص فراہم کرسکتے ہیں۔
گنبد نما چھت اور گھر کی قیمت
اگر آپ مستقبل میں کسی وجہ سے اپنے گھر کو بیچنے کا فیصلہ کرتے ہیں تو گنبد نما چھت کا اس کی قیمت پر کیا اثر پڑے گا؟ کیا نئے خریدار آپ کے ذوق کے معترف ہوں گے یا اسے نظر انداز کردیں گے؟
ماہرین کے مطابق اس بات کا دارومدار ایک سے دوسرے شخص کے ذوق کے مطابق ہی ہوگا۔ تاہم تعمیراتی ماہرین کا ماننا ہے کہ گھر خریدنے والے اکثر افراد کی خواہشات کی فہرست میں گنبد نما چھت شامل نہیں ہوتی۔
