فرمان الہی
نماز کے اوقات
سلطان آف جوہر ہاکی کپ میں پاکستان اور بھارت کے درمیان میچ 3، 3 گول سے برابر ہو گیا۔
میچ کے دوران پاکستان کو ایک وقت پر 2-0 صفر کی برتری حاصل تھی، بھارت نے 2 گول کر کے پہلے مقابلہ برابر کیا، پھر تیسرا گول کر کے برتری حاصل کی لیکن سفیان خان نے میچ کے اختتام سے 4 منٹ قبل گول کر کے مقابلہ برابر کر دیا۔
ملائیشیا کے شہر جوہر بارو میں پاکستان اور بھارت کے درمیان میچ برق رفتاری سے شروع ہوا، جس کے چوتھے ہی منٹ میں پاکستان کو پنالٹی اسٹروک مل گیا، جس پر کپتان حنان شاہد نے گول کر دیا۔
پہلا کوارٹر 1-0 پر ختم ہوا، جبکہ دوسرے کوارٹر میں کوئی ٹیم گول نہ کر سکی۔
تیسرے کوارٹر میں کھیل میں مزید تیزی آئی، سفیان خان نے 38ویں منٹ میں پنالٹی کارنر کے ذریعے گول کر کے اسکور 2-0 کر دیا۔
4 منٹ بعد ہی بھارت کو پنالٹی اسٹروک مل گیا جس پر ہنڈل ارجیت سنگھ نے خسارہ کم کیا، تیسرا کوارٹر پاکستان کی 2-1 کی برتری پر ختم ہوا۔
چوتھے اور آخری کوارٹر میں بھارتی ٹیم نے پہلے مقابلہ برابر کیا پھر 52 ویں منٹ میں بھارت کے منمیت سنگھ نے گول کر کے اپنی ٹیم کو 3-2 کی برتری دلا دی۔
3 منٹ بعد ہی سفیان خان نے خوبصورت گول کر کے مقابلہ برابر کر دیا، یوں میچ 3-3 گول کی برابری پر ختم ہوا۔
پاکستانی ٹیم کل نیوزی لینڈ کے خلاف میچ کھیلے گی۔
میچ کے آغاز سے قبل پاکستان اور بھارت کی ہاکی ٹیموں نے قومی ترانے کے بعد روایتی انداز میں ہائی فائیو کرتے ہوئے تالی ماری تھی۔
