فرمان الہی
نماز کے اوقات
کراچی ( اسٹاف رپورٹر)اسٹیٹ بینک آف پاکستان اور انٹرنیشنل فنانس کارپوریشن کے درمیان معاہدہ، آئی ایف سی کے ساتھ اس شراکت داری کا مقصد نجی شعبے کے لئے قرضوں کے مواقع میں اضافہ ہے۔تفصیلات کے مطابق پاکستان نے ورلڈ بینک گروپ کے نجی شعبے کے ادارے انٹرنیشنل فنانس کارپوریشن (آئی ایف سی)کے ساتھ شراکت داری کی ہے جس کا مقصد مقامی کرنسی میں قرضوں کا اجرا بڑھانا اور پاکستان میں نجی شعبے کی نمو میں معاونت کرنا ہے۔آئی ایس ڈی اے (ISDA) معاہدے کے تحت، اس شراکت داری سے آئی ایف سی کرنسی کے خطرات کا موثرانتظام اور پاکستانی روپے میں سرمایہ کاریاں بڑھا سکے گا ۔ یہ معاہدہ پاکستانی معیشت کے اہم شعبوں کو قرضوں کی فراہمی میں حائل رکاوٹیں دور کرنے اور ملک بھر میں ملازمتیں پیدا کرنے کی سمت ایک اہم قدم ہے۔ گورنر اسٹیٹ بینک جمیل احمد نے کہا کہ پاکستان میں نجی شعبے کی نمو کو فروغ دینا ملک کی کامیاب اور پائیدار معاشی ترقی کے لئے نہایت اہم ہے۔آئی ایف سی کے ساتھ اس شراکت داری کا مقصد نجی شعبے کے لئے قرضوں کے مواقع میں اضافہ ہے۔آئی ایف سی کے نائب صدر اور ٹریژری اورموبلائزیشن کے ٹریژرر جان گینڈولفو نے کہا کہ کرنسیوں میں اتار چڑھائو ترقی پذیر معیشتوں کو لاحق نمایاں خطرات میں سے ہے، اور مقامی کرنسی میں قرضوں کا اجرا پہلے کے مقابلے میں اب بہت زیادہ اہم ہو چکا ہے۔ ورلڈ بینک گروپ ایسے قرضوں کے فروغ کو اسٹریٹجک ترجیح دیتا ہے اور اس سے پاکستان میں معاشی نمو کو تحریک ملے گی۔شرح مبادلہ کے خطرات ترقی پذیر ملکوں کی کمپنیوں کے لئے سنگین چیلنج ہیں جو امریکی ڈالر جیسی مستحکم کرنسیوں میں قرض لیتی ہیں جبکہ اپنی آمدنی مقامی کرنسی میں حاصل کرتی ہیں۔
