فرمان الہی
نماز کے اوقات
راولپنڈی ٹیسٹ کے دوسرے دن جنوبی افریقا نے پہلی اننگز میں 4 وکٹ پر 185 رنز اسکور کرلیے، اس سے قبل پاکستانی ٹیم پہلی اننگز میں 333 رنز بناکر آؤٹ ہوگئی تھی۔
دوسرے دن پاکستان نے کھیل کا آغاز 259 رنز 5 کھلاڑی آؤٹ سے کیا، بقیہ بیٹرز اسکور میں مزید 74 رنز کا اضافہ کرنے میں کامیاب رہے۔
پہلے دن 42 رنز پر ناٹ آؤٹ رہنے والے بیٹر سعود شکیل 66 رنز کی اننگز کھیلنے میں کامیاب رہے جبکہ سلمان آغا نے 45 رنز بنائے، اُن کے علاوہ شاہین آفریدی صفر، ساجد خان 5 اور آصف آفریدی 4 رنز بناکر آؤٹ ہوئے۔
جنوبی افریقی بولر کیشو مہاراج نے اپنی اسپن بولنگ سے 7 کھلاڑیوں کو پویلین کی راہ دکھائی، 2 وکٹیں سائمن ہارمر کو ملیں۔
جنوبی افریقہ نے پہلی اننگز کا آغاز کیا تو 54 رنز پر ریان ریکلٹن اور ایڈین مارکرم آؤٹ ہوگئے، تیسری وکٹ پر اسٹبس اور زورزی نے 113 رنز کی شراکت قائم کی، زورزی 55 رنز بناکر ٹیسٹ کرکٹ میں آصف آفریدی کا پہلا شکار بنے۔
ڈیوالڈ بریسوس صفر پر آؤٹ ہوئے، اسٹبس 68 رنز پر ناٹ آؤٹ ہیں، جنوبی افریقا کا اسکور 4 وکٹ پر 185رنز ہے، اُسے اب بھی 148 رنز کے خسارے کا سامنا ہے۔
واضح رہے کہ پہلے سیریز کے پہلے ٹیسٹ میچ میں پاکستان نے دفاعی چیمپئن جنوبی افریقہ کو 93 رنز سے شکست دے کر ورلڈ ٹیسٹ چیمپئن شپ (ڈبلیو ٹی سی) 27-2025 میں فاتحانہ آغاز کیا تھا۔
