فرمان الہی
نماز کے اوقات
اسرائیلی پارلیمنٹ کے رکن اوفر کسیف نے کہا ہے کہ دنیا اسرائیل کو غزہ کے بعد مغربی کنارے میں ایک اور نسل کشی کی جانب بڑھنے سے روکے۔
عرب میڈیا کے مطابق اسرائیل کی حدس تل پارٹی کے رکن پارلیمان اوفر کسیف نے عالمی برادری کو خبردار کرتے ہوئے کہا ہے کہ اسرائیل مغربی کنارے میں ایک اور نسل کشی کا ارادہ رکھتا ہے۔
انہوں نے کہا کہ ہم اسرائیلی ایک خانہ جنگی کی جانب بڑھ رہے ہیں، اس خطرے کا سامنا آج اسرائیلی یہودی اور عرب دونوں کو ہے، ان دونوں خطرات سے نمٹنے کے لیے ہم سے رابطہ کیا جائے اور جو کچھ ممکن ہوسکے وہ کیا جائے۔
انہوں نے مزید کہا کہ ہم ان خطرات سے تنہا نبرد آزما نہیں ہوسکتے، اس وقت موجودہ ساری صورتحال میں یہاں بسے فلسطینی اور اسرائیلی ایک جیسے حالات کا سامنا کر رہے ہیں، ان ممکنہ خطرات سے پورا خطہ متاثر ہوسکتا ہے، ان خطرات سے نمٹنے کا واحد راستہ صرف انصاف سے ممکن ہے۔
بتاتے چلیں کہ اوفر کسیف عرب اکثریتی جماعت سے تعلق رکھنے والی جماعت حدس تل پارٹی سے تعلق رکھنے والے یہودی رکنِ پارلیمنٹ ہیں اور ابھی حال ہی میں امریکی صدر کے اسرائیلی پارلیمنٹ سے خطاب کے دوران ان کے ساتھی عرب رکن پارلیمنٹ ايمن عودہ کو پارلیمنٹ سے بے دخل کردیا گیا تھا۔
