فرمان الہی
نماز کے اوقات
وزیرِ اعظم شہباز شریف نے ریاض میں ورلڈ اکنامک فورم کے صدر اور چیف ایگزیکٹو بورگ برینڈے سے ملاقات کی ہے۔
یہ ملاقات فیوچر انویسٹمنٹ انیشی ایٹو کے موقع پر عالمی اقتصادی فورم کی قیادت کی درخواست پر ہوئی۔
ملاقات کے دوران وزیرِ اعظم نے پاکستان اور عالمی اقتصادی فورم کے درمیان مضبوط روابط کو سراہا اور حکومت کی اقتصادی اصلاحات پر روشنی ڈالی۔
وزیرِ اعظم شہباز شریف نے گزشتہ 18 ماہ میں بہتر میکرو اکنامک اشاریوں پر اطمینان کا اظہار کیا اور کہا کہ استحکام، مالیاتی نظم و ضبط، سرمایہ کاری، ڈیجیٹل تبدیلی پر خصوصی توجہ مرکوز ہے۔
انہوں نے کہا کہ حکومت کی توجہ برآمدات، پبلک پرائیویٹ پارٹنر شپ، نوجوان افرادی قوت اور آئی ٹی میں ترقی پر مرکوز ہے، پاکستان جنوبی ایشیاء، وسطی ایشیاء اور مشرقِ وسطیٰ کے درمیان روابط کے لیے ایک اہم پل ہے۔
اس موقع پر بورگ برینڈے نے عالمی اقتصادی فورم کے ساتھ پاکستان کے فعال کردار پر وزیرِ اعظم شہباز شریف کا شکریہ ادا کیا۔
ورلڈ اکنامک فورم کے صدر اور چیف ایگزیکٹو نے کہا کہ باہمی طور پر فائدہ مند شراکت داری کوفروغ دینے میں پاکستان کی مسلسل حمایت کے لیے پُرامید ہیں۔
