فرمان الہی
نماز کے اوقات
تھائی لینڈ کے دارالحکومت بنکاک میں منعقدہ مقابلہ حسن میکسیکو کی حسینہ فاطمہ بوش نے تنازعات و دباؤ کے باوجود جیت لیا۔
غیر ملکی میڈیا رپورٹس کے مطابق میکسیکو کی فاطمہ بوش نے مس یونیورس 2025 کا ٹائٹل اپنے نام کرکے حسینہ عالم کا تاج پہن لیا۔ انہیں گزشتہ سال کی فاتح ڈنمارک کی وکٹوریا کیئر تھیلوِگ نے تاج پہنایا۔
میزبان ملک تھائی لینڈ کی نمائندگی کرنے والی وینا پروینر سنگھ کو فرسٹ رنر اپ قرار دیا گیا جبکہ وینزویلا کی اسٹیفنی اباسالی، فلپائن کی آتھیسا مانیلو اور آئیوری کوسٹ کی اولیویا یاسے ٹاپ 5 میں شامل رہیں۔
میڈیا رپورٹس کے مطابق تھائی لینڈ میں منعقدہ اس سال کا مقابلہ حسن آغاز سے ہی توجہ کا مرکز بنا رہا۔ پہلے میکسیکو کی فاطمہ بوش لائیو اسٹریمڈ میٹنگ کے دوران تھائی ایونٹ ڈائریکٹر کی سرِعام سرزنش کا نشانہ بنیں، جس کے بعد مقابلہ حسن میں شریک متعدد حسیناؤں نے احتجاجاً واک آؤٹ کیا تھا۔
اس واقعہ کے بعد 25 سالہ فاطمہ بوش مداحوں کی پسندیدہ امیدوار کے طور پر ابھری تھیں۔
میڈیا رپورٹس کے مطابق اس کے بعد جعمے کو ہونے والے فائنل سے قبل مس یونیورس مقابلے کے دو ججز نے استعفیٰ دے دیا تھا۔
میڈیا رپورٹس کے مطابق رواں سال 120 ممالک کی نمائندہ خواتین نے مقابلے حسن میں حصہ لیا، جن میں فلسطین سے ندین ایوب اور اماراتی مریم محمد پہلی بار مقابلے کے میدان میں اُتریں۔ روما ریاض نے پاکستان کی نمائندگی کی۔
واضح رہے کہ فاطمہ بوش انسانیت دوست سرگرمیوں اور رضاکارانہ کاموں کے لیے جانی جاتی ہیں۔ انہوں نے فیشن ڈیزائن کی تعلیم میکسیکو سے حاصل کر رکھی ہے۔
انہوں نے ستمبر 2025 میں مس میکسکیو کا ٹائٹل اپنے نام کیا تھا۔
