فرمان الہی
نماز کے اوقات
معروف پاکستانی اداکارہ سحر خان نے سوشل میڈیا پر ایک پوسٹ شیئر کرکے مداحوں کو خوشگوار حیرت میں ڈال دیا، لیکن چند ہی گھنٹوں میں یہ خوشی شدید تنقید میں بدل گئی۔
سحر خان نے اپنے کیریئر کا آغاز 2018 میں کیا تھا، آج وہ 3.2 ملین انسٹاگرام فالوورز کی حامل ایک نمایاں اداکارہ ہیں۔
گزشتہ دنوں سحر خان نے اپنے انسٹاگرام پر ایک تصویر شیئر کی جس میں وہ ایک مرد کے ساتھ بیٹھی تھیں لیکن اس تصویر میں کسی کی شکل نظر نہیں آئی، جبکہ اسٹوری کے کیپشن میں لکھا تھا کہ ’الحمد اللّٰہ بڑا دن ہے۔‘
اس کیپشن نے سوشل میڈیا پر تہلکہ مچا دیا اور مداحوں سمیت میڈیا پیجز نے فوراً قیاس آرائیاں شروع کردیں کہ شاید اداکارہ جلد شادی کرنے والی ہیں۔
تاہم آج سحر خان نے ایک وضاحتی پوسٹ شیئر کرتے ہوئے کہا، ’پلیز چِل کریں یہ میری دوست کا بڑا دن تھا میرا نہیں۔‘
اداکارہ کی اس وضاحت نے مداحوں کے غصے میں مزید اضافہ کردیا، صارفین نے اسے غیر سنجیدہ، توجہ حاصل کرنے کا ہتھکنڈا اور ’سستی شہرت‘ کا طریقہ قرار دیا۔
ایک صارف نے لکھا کہ ان کو پتہ ہے کہ افواہیں کس طرح پھیلانی ہیں، جبکہ ایک اور نے کہا کہ یہ کوئی مذاق نہیں صرف توجہ حاصل کرنے کا حربہ ہے۔
ایک تبصرہ یہ بھی سامنے آیا کہ پہلے خود ہی سرخیاں بناتے ہیں اور پھر شکایت کرتے ہیں کہ لوگ نجی زندگی میں دخل دیتے ہیں۔ ایک اور صارف نے مشورہ دیا کہ سستی شہرت کے طریقے چھوڑ دیں، اسٹارز کی طرح برتاؤ سیکھیں۔
