فرمان الہی
نماز کے اوقات
بھارتی ریاست مدھیہ پردیش کے ضلع رائے سین میں رِیل بنانے کا جنون ایک اور جان لے گیا۔ 25 سالہ مدن نوریا ایک 50 فٹ بلند پل سے گر کر ہلاک ہو گیا، واقعہ منگل کی شام پیش آیا۔
پولیس کا کہنا ہے کہ نوریا نورنگر کا رہائشی تھا اور قریب ہی ایک ڈھابے پر کام کرتا تھا۔ وہ سورج ڈوبنے کے وقت پل پر کھڑے ہو کر تصاویر اور ریِلز بنا رہا تھا اور انہیں سوشل میڈیا پر اپ لوڈ کر رہا تھا کہ اچانک اس کا توازن بگڑ گیا اور نیچے جا گرا۔
گرنے سے اس کی ریڑھ کی ہڈی ٹوٹ گئی اور سر پر شدید چوٹ آئی، جس سے وہ موقع پر بے ہوش ہو گیا۔ ڈھابے کے ملازمین نے خون میں لت پت نوجوان کو فوری طور پر اُدیپورا کے اسپتال پہنچایا، مگر ڈاکٹرز نے اسے مردہ قرار دے دیا۔
تحقیقات میں معلوم ہوا کہ مدن نوریا گرتے وقت موبائل سے اپنی ریکارڈنگ کرنے میں مصروف تھا، موبائل میں موجود ایک کلپ میں حادثے کا وقوعہ بھی ریکارڈ ہو گیا۔
خیال رہے کہ رائے سین میں ایک سال کے دوران یہ تیسرا واقعہ ہے، جس میں سوشل میڈیا پر ریل بنانے کا شوق نوجوانوں کی جان لے گیا، اس سے قبل بھوپال کے دو نوجوان ہلالی ڈیم میں ڈوب کر ہلاک ہوئے جبکہ ایک نوجوان لڑکی مہادیو واٹر فال میں پھسل کر جان کی بازی ہار گئی تھی۔
