فرمان الہی
نماز کے اوقات
شاید ہی ایسا گھر ہو جہاں کوئی صبح بغیر ناشتے کیے گھر سے چلا جائے ۔آپ کا ناشتہ کرنے کا موڈ نہ بھی تو آپ کی ماں آپ کو ایک گلاس دودھ ضرورپلادے گی کیونکہ ہماری مائیں جانتی ہیں کہ صبح کا ناشتہ ہماری صحت و تندرستی کیلئے بہت ضروری ہے۔
ایک مشہور کہاوت ہے کہ ناشتہ کروبادشاہ کی طرح، دوپہر کا کھانا کھاؤ شہزادے کی طرح اور رات کھانا ایسے کھاؤ جسے فقراء کھاتے ہیں، یعنی رات کا کھانا شکم سیر ہو کر نہ کھائیں۔ اس فلسفے کو اپنانے کے بجائے اگر آپ اس کے برعکس عمل کررہے ہیں تو یقین جانیں آپ اپنی صحت کے دشمن بنے ہوئے ہیں۔
بیشتر موجودہ غذائی رہنما اصول بھی یہی مشورہ دیتے ہیں کہ آپ اگرروزانہ ناشتہ نہیں کریں گے تو آپ موٹاپے کا شکار ہو سکتے ہیں۔ مطالعوں سے پتہ چلتا ہے کہ صحت بخش ناشتہ کھانے والے افراد فربہ یا موٹے ہونے کے کم امکان کے ساتھ صحت مند ہوتے ہیں اور انہیں متعدد دائمی بیماریاں ہونے کا خطرہ بھی کم ہوتا ہے۔
برطانیہ کی ہارٹ فاؤنڈیشن سے منسلک ماہرین اپنے تحقیق میں لکھتے ہیں کہ صبح کا ناشتہ چھوڑنا ہماری صحت پر گہرے اثرات مرتب کرتاہے اور اگر آپ ناشتہ نہیں چھوڑیں گے تو آپ کو امراض قلب کا خطرہ کم سے کم ہوگا۔
صبح کا ناشتہ کرنے سے آپ اگر اجتناب کرتے ہیں تو آپ کو درج ذیل مسائل کا سامنا ہو سکتا ہے :
میٹابولزم کی سطح میں کمی
میٹابولزم ایک اصطلاح ہے جو خلیوں اور حیاتیات کی زندہ حالت کو برقرار رکھنے میں شامل تمام کیمیائی رد عمل کو بیان کرنے کے لئے استعمال ہوتی ہے۔ کچھ شواہد بتاتے ہیں کہ ناشتہ کرنے سے آپ اپنے جسم کو دن بھر زیادہ کیلوریز جلانے میں کامیاب ہو سکتے ہیں۔
جب آپ طویل عرصہ تک کوئی کھانا نہیں کھاتے تو ، آپ کا جسم اپنے اندر زیادہ سے زیادہ کیلوریز اسٹور کرنے کی کوشش کرتا ہے، تاکہ جسم کی طاقت کو زیادہ تک برقرار رکھا جاسکے، لیکن جیسے ہی میٹا بولزم کا عمل سست پڑتا ہے، آپ کا جسم گلوکوز استعمال کرنے لگتاہے جو کہ آپ کے عضلات میں ایندھن کے بیک اپ سورس کے طور پر محفوظ ہوتا ہے اور اس کا اثر آپ کے عضلات اور جسمانی افعال پر پڑتا ہے۔
بلڈ شوگر لیول میں کمی
ناشتہ (Breakfast)کا لفظی مطلب ’روزہ توڑنا‘ ہے کیونکہ آپ رات بھر سوئے رہتے ہیںاور آپ کا رات کا کھانا ہضم ہوچکا ہوتاہے۔ اس لئے صبح کھانے پینے سے آپ کے جسم میں گلائکوجن (glycogen ) کی بحالی اور انسولین کی سطح مستحکم ہونے میں مدد ملتی ہے۔ صبح ناشتہ نہ کرنے سے آپ کے جسم میں گلوکوز کی سطح کم ہونے لگتی ہےا ور باقی ماندہ دن میں آپ کو زیادہ بھوک ، چڑچڑےپن اور تھکاوٹ کا احساس ہو نے لگتاہے۔
دل کی بیماری کا خطرہ
صبح کا ناشتہ اگر آپ باقاعدگی سے چھوڑ رہے ہیں تواس سے آپ کا وزن بڑھ سکتاہے اور وزن بڑھنے کا مطلب ہے ایتھیروسلروسس، (دل کی ایک بیماری جس میں ایک غیر لچکدار مادہ د ل اور اس کی شریانوں میں جمع ہو جاتا ہے )، دل کی بیماری ، ہائی بلڈ پریشر ، ذیابیطس، موٹاپا اور ہائی کولیسٹرول کا بڑھ جانا۔
1992ء سے لے کر 2008ء تک 16 سالہ مدت میں اور 26 ہزار لوگوں پر محیط یک تحقیق میں بتایا گیا ہے کہ وہ مرد جو روزانہ ناشتہ چھوڑ دیتے ہیں، انھیں دل کا دورہ پڑنے کا امکان 27فیصد زیادہ ہوتا ہے۔
اسٹریس ہارمون کی سطح میں اضافہ
ناشتہ کرنے سے کورٹیسول (cortisol ) ہارمون پرمثبت اثر پڑ سکتا ہے جو ایک بنیادی اسٹریس ہارمون ہے اور یہ ایڈرینل غدود سے تیار ہوتا ہے۔ صبح 7 بجے کے قریب کورٹیسول کی سطح سب سے زیادہ ہوتی ہے، اسی وجہ سے کچھ کھا نا ضروری ہے تاکہ آپ ہارمون کی سطح کو نیچے لا سکیں۔
لازمی امر ہے، جب کورٹیسول کی سطح بہت زیادہ ہوگی تو ، آپ کے اندر بےچینی یا گھبراہٹ محسوس ہونے کے امکانات بھی بڑ ھ جائیں گے۔
عام وجوہات
صبح کا ناشتہ نہ کرنے کی سب سے عام وجوہات میں سے ایک یہی ہے کہ لوگ بھوک محسوس نہیں کرتے۔ یا مصروفیات کی وجہ سے ناشتہ نہیں کرپاتے اور صبح اٹھ کر دفتر چلے جاتے ہیں اور وہاں پہنچ کر ناشتے کے نام پر ایک کپ چائے پی لیتے ہیں، جس سے ان کے نظام ہاضمہ پر مضر اثرات پڑتے ہیں۔
معدہ خالی وہنے سے السر ہونے کا امکان بھی پیدا ہوتا ہے اور دوسری جانب ماحولیاتی آلودگی بھی آپ کیلئے زہر کا کام کررہی ہوتی ہے۔ اگر آپ بھی ان لوگوں میں سے ایک ہیں جو ناشتہ نہیں کرتے تو آپ اپنے دن کا آغاز ملک شیک یا صحت بخش اسموتھی سے کرسکتے ہیں۔
بے شک آپ کم مقدار میں ناشتہ کریں، یا اپنی پسند کی چیز ناشتے میں کھائیں لیکن اسے کھائیں ضرور تاکہ آپ اپنے لئے ایک صحت مند روٹین بنانے میں کامیاب ہوسکیں۔
