فرمان الہی
نماز کے اوقات
بالی ووڈ کے اسٹار اداکار اور مسٹر پرفیکشنسٹ عامر خان نے کہا ہے کہ 60 سال کی عمر میں دوبارہ محبت ملنے کی توقع نہیں تھی۔
ایک تقریب میں عامر خان نے اپنی ذاتی زندگی، سابقہ بیویوں کے ساتھ خوشگوار تعلقات اور 60 سال کی عمر دوبارہ محبت ملنے کے تجربے پر کھل کر گفتگو کی۔
اسٹار اداکار نے بتایا کہ مجھے توقع نہیں تھی کہ میں دوبارہ کسی رشتے میں بندھ جاؤں گا، گوری سپراٹ میری زندگی میں سکون، استحکام اور خوش قسمتی کا ذریعہ ہیں۔
عامر خان نے مزید کہا کہ گوری اور میں 25 سال سے ایک دوسرے کو جانتے ہیں، ہم گزشتہ 2 برس سے رشتے میں ہیں، وہ واقعی حیرت انگیز انسان ہے، میں خود کو خوش قسمت سمجھتا ہوں۔
انہوں نے یہ بھی کہا کہ میں خوش ہوں کہ مجھے رینا، کرن اور اب گوری جیسے لوگ ملے جنہوں نے میری شخصیت کی تعمیر میں بڑا کردار ادا کیا، میں کئی لحاظ سے ان سے سیکھتا ہوں۔
اسٹار اداکار نے کہا کہ سابقہ اہلیہ رینا دتہ اور کرن راؤ کے ساتھ آج بھی مضبوط اور احترام پر مبنی رشتہ رکھتے ہیں، اپنی شادیوں کی ناکامی کے باوجو ان خواتین کی زندگی میں اہمیت کو سراہتا ہوں۔
اُن کا کہنا تھا کہ ہم آج بھی ایک خاندان کی طرح جڑے ہوئے ہیں، یہ اس بات کا ثبوت ہے کہ ہم اچھے انسان ہیں، بطور میاں بیوی ہم نے الگ ہونے کا فیصلہ کیا لیکن خاندانی طور پر جدا نہیں ہوئے۔
یاد رہے کہ عامر خان نے 1986ء میں رینا دتہ سے شادی کی، جن سے اُن کے 2 بچے جنید خان اور ایرا ہیں، 2002ء میں ان کے درمیان علیحدگی ہوگئی تھی۔
عامر خان نے 2005ء میں فلمساز کرن راؤ سے شادی کی، 2011ء میں اُن کے صاحبزادے آزاد راؤ خان کی پیدائش ہوئی۔
عامر خان کی اگلی فلم ’ہیپی پٹیل: خطرناک جاسوس‘ ہے، جو 16 جنوری 2026ء کو ریلیز ہوگی، جس میں وہ ایک کیمیو کردار ادا کررہے ہیں۔
