فرمان الہی
نماز کے اوقات
میئر کراچی مرتضیٰ وہاب کا کہنا ہے کہ کام ہمارا ہوتا ہے اور تختی منعم ظفر کی لگا دیتے ہیں، میں بارہا وضاحت کے ساتھ کہہ چکا ہوں کہ کام کریں ہم آپ کے ساتھ ہیں۔
کراچی میں میڈیا سے گفتگو کرتے ہوئے مرتضیٰ وہاب نے کہا کہ میرا مقصد ووٹ کاٹنا نہیں لوگوں میں امید جگانا ہے۔
انہوں نے دعویٰ کیا کہ نارتھ ناظم آباد کی شاہراہِ نور جہاں میں نے بنوائی ہے اور بینر شکریہ جماعت اسلامی کے لگائے گئے، اگر یہ لوگ کام کریں گے تو 11 بجے تنقید اور تعصب کی پریس کانفرس کیسے کریں گے؟
مرتضیٰ وہاب نے کہا کہ سندھ سمیت دنیا بھر میں بسنے والے سندھیوں کو سندھی کلچر ڈے کی مبارکباد پیش کرتا ہوں، یہ دھرتی امن اور محبت کرنے والوں کی ہے، ہمارا پیغام امن، محبت اور اتحاد ہے۔
میئر کراچی نے کہا کہ پرانے شہر میں برتن گلی، کھجور مارکیٹ، جونا مارکیٹ کا علاقہ ہے، یہاں یومیہ کروڑوں روپے کی تجارت ہوتی ہے، اطراف میں سو اور سوا سو سالہ پرانی عمارتیں نظر آتی ہیں، جب کوئی چیز پرانی ہوتی ہے تو لوگ اسے بھول جاتے ہیں، اس علاقے کے عوام کو بیشتر مشکلات درپیش ہیں، اس علاقے کا سیوریج، نکاسیٔ آب کا نظم تباہ حالی کا شکار تھا، یہ علاقہ اور حدود کسی اور کی ہیں۔
انہوں نے کہا کہ چائنہ کٹنگ کر کے اس علاقے کے ساتھ بد دیانتی کی گئی، پیپلز پارٹی کا صرف ایک کونسلر ہے یہاں پر، اس علاقے کے کونسلر نے یہاں کا مقدمہ ہم سے لڑا، یہاں پر میں رات کو آتا تھا تو ہر جگہ گندگی و غلاظت تھی۔
مرتضیٰ وہاب نے کہا کہ بلدیہ عظمیٰ کراچی نے وعدہ کیا کہ ہم آپ کے گلی محلوں کو ٹھیک کر کے دیں گے، ایک ایک پائی جو کے ایم سی کے اکاؤنٹ میں آتی ہے وہ اس شہر کی ترقی و بحالی پر خرچ ہوتی ہے۔
میئر کراچی نے کہا کہ چار بازاروں کی سیوریج لائنز ڈالی گئیں، ہم نے یہاں سڑکوں پر پیور لگائے، 2 لاکھ 20 ہزار اسکوائر فٹ پیور لگائے گئے، یہاں کی تاجر برادری نے کہا کہ پہلی بار شہر کا پیسہ شہر میں لگا ہے، تاجر و مکین ان سڑکوں کی تعمیر سے خوش ہیں۔
انہوں نے کہا کہ نکاح کے لیے لوگ چھوارے لینے انہی سڑکوں پر آتے ہیں، 15 دسمبر تک ہم اسی علاقے کے لیے ایک اور اسکیم لا رہے ہیں، 50 کروڑ روپے مزید ہم ان سڑکوں پر لگائیں گے۔
میئر کراچی نے بتایا کہ لیاری ٹاؤن کی اندرونی گلیوں کو بنانے کے لیے 1 ارب روپے لگانے جا رہے ہیں، کے ایم سی ملیر میں ڈیڑھ ارب روپے سے فلائی اوور تعمیر کر رہے ہیں۔
