فرمان الہی
نماز کے اوقات
ایس ایس پی گھوٹکی انور کھیتران نے کچہ رجوانی، کچہ عمرانی اور کچہ کراچی سے ڈاکوؤں کے صفایے کا دعویٰ کر دیا۔
ایس ایس پی انور کھیتران کا کہنا ہے کہ کچہ رجوانی، کچہ عمرانی اور کچہ کراچی سے ڈاکوؤں کا صفایا کر دیا ہے۔
انہوں نے کہا کہ کچے کے علاقوں میں پولیس اور رینجرز نے مشترکہ آپریشن کیا، آپریشن کے بعد کچے کے کلیئر علاقے راجن پور پولیس کے سپرد کر دیے۔
ایس ایس پی کا کہنا تھا کہ تباہ بنکروں سے اسلحہ اور بارود کی برآمدگی کے لیے بم ڈسپوزل اسکواڈ کو طلب کیا گیا ہے، ڈاکوؤں کے مورچوں میں ان کے پڑے راکٹ پھٹنے کا اندیشہ ہے۔
انور کھیتران نے کہا کہ اتنا اسلحہ ملا ہے شاید وانا وزیرستان میں بھی نہ ملا ہو، 14 مسافروں کے اغواء کے بعد آپریشن کرنا پڑا۔
ان کا کہنا تھا کہ آپریشن میں خطرناک ڈاکوؤں سمیت 16 ڈاکو مارے گئے ہیں، 9 ڈاکوؤں کی تصدیق ہوچکی ہے جبکہ 7 کی لاشیں تلاش کی جا رہی ہیں۔ ڈاکوؤں کی لاشیں ابھی تک دریائی علاقوں میں ہیں۔
ہلاک ڈاکوؤں میں بکھرانی گینگ کا سرغنہ چھلو بکھرانی بھی شامل تھا، آپریشن کے دوران 27 ڈاکو زخمی ہوئے ہیں جبکہ آپریشن میں 9 مغوی بازیاب کرائے گئے ہیں۔ ایک شخص کی لاش ملی ہے، جس کا شبہ ہے کہ مغوی ہے۔
