فرمان الہی
نماز کے اوقات
وزیر دفاع خواجہ محمد آصف نے کہا ہے کہ ہمارے جہاز بھارت سے جنگ میںں ٹیسٹ ہوگئے، ہمیں اتنے آرڈر مل رہے ہیں کہ ہوسکتا ہے کہ 6 ماہ بعد آئی ایم ایف کی ضرورت نہ پڑے۔
جیو نیوز کے پروگرام کیپٹل ٹاک میں گفتگو کے دوران خواجہ آصف نے کہا کہ ہم بھارت اور افغانستان سے جنگ کےلیے تیار ہیں، ہم نے مئی 2025ء میں ثابت کردیا تھا۔
انہوں نے کہا کہ پاک بھارت جنگ میں پاکستان کا جواب پوری دنیا نے دیکھا، پوری دنیا نے دیکھا کہ مودی کو پھینٹی پڑی، اُس کی نہ ملک میں اور نہ ہی بیرون ملک عزت رہی۔
وزیر دفاع نے مزید کہا کہ پاک بھارت جنگ کے دوران بھارت نے امریکا کو اپروچ کیا اور چین سے بھی رابطہ کیا تھا، اب بھی بھارت نے جارحیت کی تو ویسے ہی جواب دیا جائے گا۔
انہوں نے کہا کہ بھارت کو شکست دے کر ہماری عزت میں اضافہ ہوا ہے، ہمارے جہاز ٹیسٹ ہوگئے، ہمیں اتنے آرڈر مل رہے ہیں ہوسکتا ہے 6 ماہ بعد آئی ایم ایف کی ضرورت نہ پڑے۔
خواجہ آصف نے یہ بھی کہا کہ وینزویلا کے پاس زیادہ بڑی فوج اور ہتھیار نہیں تھے، پاکستانی فوج کا لوہا پوری دنیا مانتی ہے۔
اُن کا کہنا تھا کہ مئی 2025 کی جنگ کے بعد بھارت کا اعتماد تباہ ہوگیا، افغان طالبان اور ٹی ٹی پی قابل اعتبار نہیں یہ بھارت سے ملے ہوئے ہیں، کے پی حکومت کے لوگ ٹی ٹی پی کو بھتا دیتے ہیں۔
وزیر دفاع نے کہا کہ اگر امریکا انسانیت کا دوست ہے تو وہ نیتن یاہو کو اغوا کرے اور کسی عدالت میں مقدمہ چلائے، دعا کریں ترکیہ اسرائیلی وزیراعظم کو اغواء کرلے اور سارا حساب برابر کرلے۔
خواجہ آصف نے کہا کہ ورلڈ آرڈر جو بھی تھوڑا بہت ہے وہ تباہ ہورہا ہے، ایران پر امریکی حملے سے پاکستان کے لیے چیلنج پیدا ہوگا، اسرائیل نے امریکا کو بیوقوف بنایا ہے یا یہ دونوں مل کر سب کچھ کر رہے ہیں۔
اُن کا کہنا تھا کہ 2012 میں اسرائیل کہتا تھا کہ 4، 5 دن میں ایران ایٹم بم چلا دے گا، 2018ء اقوام متحدہ میں اسرائیل نے ایران سے متعلق یہ جھوٹ بولا۔
وزیر دفاع نے کہا کہ یہ سارے الزامات جواز بنانے کے لیے تھے کہ مستقبل میں ایران پر حملہ کیا جائے، وینزویلا میں جو ہوا وہ اچھا شگون نہیں۔
انہوں نے کہا کہ نیتین یاہو اس وقت سب سے زیادہ مطلوب مجرم ہونا چاہیے، اسرائیلی وزیراعظم اس وقت انسانیت کا بدترین مجرم ہے۔
