فرمان الہی
نماز کے اوقات
پاکستان کی معروف ٹی وی میزبان اور اداکارہ نادیہ خان ایک بار پھر اپنے دوٹوک اور جرات مندانہ مؤقف کی وجہ سے خبروں کی زینت بن گئیں، انہوں نے بھارتی اداکار ورون دھون کے پاکستان مخالف بیان پر سخت ردِعمل دیا ہے۔
وہ حالیہ دنوں میں نجی ٹی وی پر مارننگ شو اور ڈرامہ ریویو شو ’کیا ڈرامہ ہے‘ کی میزبانی کر رہی ہیں، نادیہ خان ماضی میں متعدد نمایاں پراجیکٹس کا حصہ رہ چکی ہیں۔
مارننگ شو کے دوران نادیہ خان نے بھارتی اداکار ورون دھون کے پاکستان سے متعلق متنازع اور دھمکی آمیز بیان پر کھل کر ردِعمل دیا، اس موقع پر شو میں موجود مہمان عدنان فیصل نے بھی بھارتی اداکار کے بیان پر تنقید کی۔
نادیہ خان کا کہنا تھا کہ ورون دھون نے ایک سخت وارننگ دینے کی کوشش کی، مگر یہ بیان ان کے لیے الٹا ثابت ہوا، یہ انداز ورون دھون پر بالکل بھی جچتا نہیں کیونکہ وہ کبھی ایکشن ہیرو کے طور پر تسلیم ہی نہیں کیے گئے۔
نادیا خان نے کہا کہ ورون دھون کا یہ بیان بھارت اور پاکستان دونوں میں بری طرح ٹرول ہوا اور انہیں ایسے بیانات دینے کے بجائے اپنے کیوٹ کرداروں تک محدود رہنا چاہیے۔
انہوں نے مزید کہا کہ بھارت حقیقی جنگی صورتحال میں کچھ کرنے کی صلاحیت نہیں رکھتا، اسی لیے وہ اپنی خواہشات فلموں کے ذریعے پوری کرتا ہے، حقیقت میں بھارت پاکستان کے خلاف منفی اقدامات کرتا رہا ہے، مگر عالمی سطح پر اب اس کی آواز کمزور ہوتی جا رہی ہے اور وہ تنہائی کی جانب بڑھ رہا ہے۔
نادیہ خان نے یہ بھی کہا کہ بھارتی فلم انڈسٹری فلم سازی میں مہارت رکھتی ہے اور ہم ان کی فلموں کی تعریف بھی کرتے ہیں، لیکن جنگ جیسے سنجیدہ موضوعات پر بات کرنا ان کے بس کی بات نہیں کیونکہ عملی میدان میں ان کی کارکردگی ناکام رہی ہے، اگر کسی کو وارننگ دینی ہی تھی تو ورون دھون کے بجائے کسی اور کو منتخب کیا جانا چاہیے تھا، کیونکہ وہ خود کوئی عملی طاقت نہیں رکھتے۔
