سردیوں کا پھل ’امرود‘جسے ’سپرفوڈ‘ مانا جاتا ہے

امرود (Guave)سردیوں کا پھل ہے، جو اپنی خوشبو اور ذائقے کے باعث لوگوں میں بہت پسند کیا جاتا ہے۔ اس کا بیرونی حصہ جتنا نرم اور ذائقہ دار ہوتا ہے، اس کے مرکز میں اتنے ہی سخت دانے بھی پائے جاتے ہیں، جو کہ امرود کا بیج ہوتے ہیں۔ امرود کو سینٹرل امریکا کی پیداوار مانا جاتا ہے، جہاں کے لوگ اسے Sand Plumبھی کہہ کر پکارتے ہیں۔

اپنی خوشبو اور ذائقے کے علاوہ، اس میں چھپے کئی صحت کے فوائد کے باعث اسے ’سپرفوڈ‘ بھی کہا جاتا ہے۔ امرود درحقیقت غذائیت کا ’پاور ہاؤس‘ ہے۔ ماہرین غذائیت کے مطابق، امرود میں وٹامن C، لائکوپین (Lycopene)اور اینٹی آکسیڈنٹس پائے جاتے ہیں۔ یہ تینوں اجزا جلد کی صحت کے لیے بہترین مانے جاتے ہیں۔

لوگ غالباً وٹامن سی اور اینٹی آکسی ڈنٹس کی خصوصیات کے بارے میں تو جانتے ہیں لیکن لائکوپین سے متعلق بہت کم سنا ہوگا۔ ایسے قارئین کے لیے ہم بتاتے چلیں کہ لائکوپین مختلف سبزیوں اور پھلوں میں پایا جانے والا جزو ہے جو غذائیت کے ساتھ ساتھ اینٹی آکسی ڈنٹ خصوصیات بھی رکھتا ہے۔ اس کے علاوہ یہ انسانی ہڈیوں کو بھی مضبوط رکھتا ہے۔

امرود میں مینگنیز بھی وافر مقدار میں پایا جاتا ہے، جس کی خصوصیت یہ ہے کہ یہ ہم جو دیگر غذائیں کھاتے ہیں، اس میں سے ضروری غذائی اجزاء کو ہمارے جسم میں منتقل کرنے میں اہم کردار ادا کرتا ہے۔

امرود میں ایک Folate نامی جزو بھی پایا جاتا ہے، جو انسانوں میں زرخیزی کو بڑھاتا ہے۔ امرود میں پایا جانے والا پوٹاشیم بلڈ پریشر کی سطح کو نارمل رکھنے میں اپنا کردار ادا کرتا ہے (ایک کیلا اور ایک امرودتقریباً مساوی مقدار میں پوٹاشیم رکھتے ہیں)۔

امرود میں غذائیت

امریکی محکمہ خوراک کے مطابق، 100 گرام کے ایک امرود میں 68 کیلوریاں اور 8.92شوگر موجود ہوتی ہے۔ امرود میں کیلشیم بھی بھرپور مقدار میں موجود ہوتا ہے اور 100گرام میں 18گرام معدنیات ہوتی ہے۔ 100گرام امرود میں 22گرام میگنیشیم کے ساتھ ساتھ اس میں فاسفورس اور پوٹاشیم بھی اچھی خاصی مقدار میں پایا جاتا ہے۔

قوتِ مدافعت کو بڑھائے

کیا آپ جانتے ہیں کہ امرود، وٹامن سی کے حصول کا ایک اہم ذریعہ ہیں؟ جی یہ سچ ہے۔ ایک امرود میں ایک اورنارنگی (Orange Fruit)کے مقابلے میں چار گنا زیادہ کیلشیم موجود ہوتا ہے۔

وٹامن سی کی جسم میں موجودگی اس کے مدافعتی نظام کو بہتر بناتی ہے اور عام انفیکشنز کے ساتھ ساتھ ایسی چیزوں سے بھی محفوظ رکھتا ہے، جو بیماری کی نشونما کی وجہ بنتی ہیں۔ صرف یہی نہیں، وٹامن سی آپ کی آنکھوں کو بھی صحت مند رکھتا ہے۔

کھانسی اور سردی سے بچائے

قدرت نے موسم کی مناسبت سے پھل پیدا کیے ہیں، ایسے میں بھلا یہ کیسے ممکن ہے کہ سردیوں کے پھل امرود میں سردیوں کی عمومی بیماریوں کھانسی اور سردی لگنے کے خلاف قوتِ مدافعت کی خصوصیت نہ ہو۔ 

پھلوں میں سب سے زیادہ وٹامن سی اور آئرن امرود میں پایا جاتا ہے اور یہ دونوں انسانی جسم کو سردی اور وائرل انفیکشن سے محفوظ رکھتے ہیں۔ کچے امرود کا جوس یا اس کے پتوں کا جوس کھانسی اور سردی سے انتہائی مفید رہتا ہے، کیونکہ یہ بلغم سے چھٹکارہ دلاتا ہے اور سانس کی نالی، گلے اور پھیپھڑوں میں انفیکشن کو ختم کرتا ہے۔

کینسر کیخلاف جنگ کرے

وٹامن سی، لائیکو پین، ہلوطین (Quercetin) اور دیگر پولی فینولز (ایسڈ کی ایک قسم) امرود میں موجود ہوتے ہیں، جو بہترین اینٹی آکسائیڈنٹس ہیں۔ یہ اینٹی آکسی ڈنٹس جسم میں پیدا ہونے والے نقصان دہ ’فری ریڈیکلز‘ کوبے اثر کرتے ہیں، جس سے جسم میں کینسر پیدا نہیں ہوتا۔ امرود پروسٹیٹ کینسر اور بریسٹ کینسر کو روکنےمیں بھی مؤثر مانا جاتا ہے۔

اینٹی ایجنگ خصوصیات

امرود میں وٹامن A، وٹامن Cاور کیروٹین اور لائکوپین جیسے اینٹی آکسی ڈنٹس پائے جاتے ہیں، جو انسانی جلد کو مُرجھانے سے محفوظ رکھتے ہیں۔ جس طرح ایک سیب روزانہ آپ کو ڈاکٹر سے دور رکھتا ہے، اسی طرح ایک امرود روزانہ آپ کی جلد کو مُرجھانے یا اس پر جُھریاں نہیں پڑنے دیتا۔

جلد نِکھارے

امرود جلد کو صرف جھریوں سے ہی محفوظ نہیں رکھتابلکہ یہ آپ کی جلد کو چمک اور تازگی بھی بخشتے ہیں۔ اس کے لیے آپ گھر پر اپنا اسکرب بھی تیار کرسکتے ہیں۔ آپ کو صرف اتنا کرنا ہے کہ امرود کے ساتھ انڈے کی زردی کو پھینٹ کر چہرے پر لگائیں۔ 20منٹ بعد نیم گرم پانی سے چہرے کو دھولیں۔ 

کم از کم ہفتے میں ایک بار یا پھر دو بار یہ اسکرب استعمال کرنے سے آپ کی جلد کے مردہ خلیے ختم ہوجائیں گے اور آپ کا چہرہ کھِل اُٹھے گا۔ اس کے علاوہ امرود میں وٹامن K بھی پایا جاتا ہے، جو جلد کا رنگ پھیکا پڑنے، جلد پر گہرے نشانات پڑنے، جلد کے لال ہونے اور دانوں کی جلن کے خلاف مزاحمت پیدا کرتا ہے۔

امرود ان خصوصیات کے علاوہ، حاملہ خواتین، قبض کی شکایت رکھنے والے افراد کے لیے بھی مفید ثابت ہوتا ہے جبکہ نظر کی کمزوری، دانت کے درد، ذہنی تناؤ، دماغی طاقت اور وزن کم کرنےمیں بھی اس کے فوائد ثابت شدہ ہیں۔