فرمان الہی
نماز کے اوقات
آرٹس کونسل آف پاکستان کراچی میں جاری عوامی تھیٹر فیسٹیول کے بارہویں روز مزاح سے بھرپور اسٹیج ڈرامہ ”مریض کروڑ کا“ پیش کیا گیا۔
مزاح، طنز اور سماجی پیغام سے بھرپور اس ڈرامے کو ناظرین کی جانب سے بھرپور پذیرائی ملی۔
ڈرامے کے مصنف اور ہدایت کار معروف کامیڈین و اداکار شکیل صدیقی تھے جنہوں نے اپنے منفرد اسلوب اور برجستہ مکالموں کے ذریعے حاضرین کو ابتدا سے اختتام تک محظوظ رکھا۔
ڈرامے میں نامور فنکاروں رؤف لالہ، سپنا غزل اور عبداللہ لالہ نے اپنی شاندار اداکاری کے جوہر دکھائے۔ ڈرامے کی کہانی ایک ایسے فراڈیے شخص کے گرد گھومتی ہے جو ایک وزیر کی گاڑی سے حادثاتی طور پر ٹکرا جاتا ہے اور اس واقعے کو دھوکہ دہی اور فراڈ کے لیے استعمال کرنے کی کوشش کرتا ہے۔
کہانی اس وقت دلچسپ موڑ اختیار کرتی ہے جب خود اس فراڈیے کے ساتھ بھی فراڈ ہو جاتا ہے، جس کے بعد صورتحال مزاحیہ ہونے کے ساتھ ساتھ سبق آموز بھی بن جاتی ہے۔
ڈرامے کے ذریعے یہ واضح پیغام دیا گیا کہ فراڈ، جھوٹ اور دھوکہ دہی کے سہارے نہ تو ترقی حاصل کی جا سکتی ہے اور نہ ہی حقیقی کامیابی۔ اختتام پر شائقین نے فنکاروں کی شاندار پرفارمنس پر تالیاں بجا کر داد دی۔
واضح رہے کہ عوامی تھیٹر فیسٹیول میں مختلف سماجی، مزاحیہ اور اصلاحی موضوعات پر مبنی ڈرامے پیش کیے جا رہے ہیں، جن کا مقصد تفریح کے ساتھ ساتھ معاشرتی شعور اجاگر کرنا ہے۔
عوامی تھیٹر فیسٹیول 15 فروری تک آڈیٹوریم II، آرٹس کونسل میں جاری رہے گا جس میں عوام فری ٹکٹ کے ذریعے شرکت کرسکتے ہیں۔
