فرمان الہی
نماز کے اوقات
پاکستانی نژاد برطانوی گلوکار زین ملک کے مداحوں کا انتظار بلآخر ختم ہوگیا۔
گلوکار نے طویل انتظار کے بعد آنے والے اسٹوڈیو البم ’کوناکول‘ کا اعلان کر دیا۔
زین ملک نے اپنے نئے میوزک البم کوناکول کے ذریعے جنوبی ایشیائی ورثے کی جانب ایک باریک مگر نمایاں اشارہ دیا ہے۔ انہوں نے مذکورہ البم میں شامل ایک گانے کے لیے اردو زبان کا بھی استعمال کیا ہے۔
پاکستانی نژاد گلوکار نے فوٹوز اینڈ ویڈیوز شیئرنگ پلیٹ فارم انسٹاگرام پر پوسٹ شیئر کرتے ہوئے اپنے پانچویں اسٹوڈیو میوزک البم کی ریلیز کا باضابطہ اعلان کیا۔
اپنی پوسٹ کے کیپشن میں انہوں نے لکھا کہ وہ وقت ایک بار پھر آ گیا ہے۔ میں خود کو خوش قسمت سمجھتا ہوں کہ مجھے پانچواں اسٹوڈیو البم بنانے کا موقع ملا۔ میرا نیا البم کوناکول 17 اپریل کو ریلیز ہو رہا ہے، جبکہ ڈائی فار می اس جمعے کو آ رہا ہے۔
میڈیا رپورٹس کے مطابق سابق ون ڈائریکشن اسٹار کے نئے البم کوناکول میں اس قدر ثقافتی رنگ نمایاں ہیں کہ اسے ان کا اب تک کا سب سے زیادہ ثقافت سے جڑا میوزک پروجیکٹ قرار دیا جا رہا ہے۔
اس سے قبل زین ملک نے ایک لائیو اسٹریم کے دوران اپنے نئے البم کے حوالے سے گفتگو کرتے ہوئے کہا تھا کہ میں جنوبی ایشیائی موسیقی پر مبنی کچھ زبردست کام کر رہا ہوں اور ان اثرات کو اپنی موسیقی میں شامل کر رہا ہوں۔
