فرمان الہی
نماز کے اوقات
وزیرِ اعلیٰ پنجاب مریم نواز نے کہا ہے کہ وقت آ گیا ہے کہ سیاہ کو سیاہ اور سفید کو سفید کہا جائے، مضبوط مؤقف اور ٹھوس انداز سے منفی بیانیے کو رد کرنا ہے۔
ایف سی ہیڈ کوارٹرز میں آمد کے موقع پر انہوں نے کہا کہ بلوچستان میں امن و امان اور استحکام پورے پاکستان کی ترجیح ہے، بلوچستان تنہا نہیں ہم سب اس کے شانہ بشانہ ہیں، دشمن ہمارے ملک کو کمزور کرنے کی سازش کر رہا ہے، اگر ہم متحد رہیں گے تو دشمن ہمارا کچھ نہیں بگاڑ سکے گا، اگر ہم مضبوط ہیں تو بدترین دشمن بھی ہمارا کچھ نہیں بگاڑ سکتا، جو پاکستان کو کمزور کرتا ہے وہ پاکستان کا بد ترین دشمن ہے۔
مریم نواز نے فرنٹیئر کور کے لیے 10 ارب روپے کی معاونت کا اعلان بھی کیا۔
انہوں نے کہا کہ ایف سی ہیڈ کوارٹرز میں آنا میرے لیے اعزاز ہے، مشکلات کے باوجود فرنٹ لائن پر لڑنے والوں کو سلام پیش کرتی ہوں، ایف سی کے جوان ملک کے لیے قربانی پیش کر رہے ہیں، ملک کے لیے قربانیاں دینے والے شہداء ہمارا سرمایہ ہیں، شہداء کی قربانیوں کو سلام پیش کرتی ہوں، سخت ترین موسمی حالات اور دشوار گزارراستوں پر سیکیورٹی کے فرائض انجام دینا بڑی بات ہے۔
مریم نواز کا کہنا ہے کہ سیکیورٹی فورسز میں خواتین کا آنا خوش آئند ہے، پاکستان کی بیٹیاں خدمت اور فرائض کی انجام دہی میں کسی سے کم نہیں۔
وزیرِاعلیٰ پنجاب نے کہا کہ پنجاب میں جرائم کی شرح میں نمایاں کمی ہوئی ہے، سی سی ٹی وی کے ذریعے ہر گلی محلے اور شاہراؤں کی نگرانی کی جا رہی ہے، دنگا فساد، جلاؤ گھیراؤ اور پولیس پر حملوں کا خاتمہ کیا ہے۔
