فرمان الہی
نماز کے اوقات
اداکارہ زارا نور عباس نے کرکٹر عماد وسیم اور ان کی سابقہ اہلیہ ثانیہ اشفاق کے درمیان جاری تنازع پر ردِعمل کا اظہار کر دیا۔
عماد وسیم ان دنوں اپنی دوسری شادی کے باعث خبروں میں ہیں، انہوں نے حال ہی میں سوشل میڈیا انفلوئنسر نائلہ راجہ سے شادی کی ہے۔
رپورٹس کے مطابق عماد وسیم پر اپنی پہلی اہلیہ کو دھوکا دینے اور تیسری اولاد کی پیدائش سے قبل اُن سے رابطہ منقطع کرنے کے الزامات عائد کیے گئے ہیں، ابتداء میں انہوں نے نائلہ راجہ سے تعلق کی خبروں کی تردید کی تھی، تاہم بعد ازاں دونوں نے شادی کی تصاویر اور ویڈیوز سوشل میڈیا پر شیئر کیں۔
زارا نور عباس نے نجی ٹی وی چینل کے پروگرام میں شرکت کی جہاں انہوں نے اس تنازع پر افسوس کا اظہار کیا۔
ان کا کہنا ہے کہ میرے پاس اس صورتِ حال پر الفاظ نہیں ہیں کیونکہ یہ انتہائی افسوس ناک معاملہ ہے، کسی بھی وجہ سے طلاق ایک دکھ بھرا مرحلہ ہوتا ہے، لیکن جب اس میں بچے شامل ہوں تو اس کے اثرات اگلی نسل تک جاتے ہیں۔
زارا نور عباس نے مزید کہا کہ آج کل یہ تمام معاملات سوشل میڈیا پر موجود ہیں اور ایک دن وہ بچے بھی یہ سب کچھ دیکھیں گے، جو یقیناً ان کے لیے تکلیف دہ ہو گا۔
انہوں نے یہ بھی کہا کہ جب شادی ٹوٹتی ہے اور دونوں فریق میڈیا پر آ کر ایک دوسرے کے خلاف بات کرتے ہیں تو یہ منظر کبھی بھی اچھا نہیں لگتا۔
