عالمی وقار کے بعد داخلی استحکام

سفارتکاری بلاشبہ دنیا کے مشکل ترین فنون میں شمار ہوتی ہے، اور اس کے ثمرات کو فوری طور پر اخذ کرنا اس سے بھی زیادہ پیچیدہ اور صبر آزما عمل ہے۔ بین الاقوامی تعلقات کی بساط پر فیصلے لمحوں میں نہیں بلکہ برسوں کی حکمت، تدبر، خاموش کاوشوں اور مسلسل سفارتی محنت سے ہوتےہیں۔ پاکستان نے حالیہ عرصے میں جس انداز سے عالمی سطح پر اپنی سفارتی صلاحیتوں کا لوہا منوایا ہے، وہ ایک قابلِ تحسین اور قابلِ تقلید مثال ہے۔ خطے میں کشیدہ حالات، عالمی طاقتوں کے متضاد مفادات اور پیچیدہ جغرافیائی سیاست کے باوجود پاکستان نے نہایت متوازن اور دانشمندانہ حکمتِ عملی اختیار کرتے ہوئے نہ صرف اپنے قومی مفادات کا تحفظ کیا بلکہ مختلف عالمی فورمز پر ایک ذمہ دار ریاست کے طور پر اپنی موجودگی کو بھی منوایا۔ یہ کامیابیاں محض اتفاق نہیں بلکہ ایک مربوط سفارتی حکمتِ عملی کا نتیجہ ہیں۔مزید برآں، پاکستان کی قیادت نے مختلف ممالک کے ساتھ مذاکرات کے عمل میں جس بردباری، فہم و فراست اور دور اندیشی کا مظاہرہ کیا، اس نے نہ صرف تناوکو کم کرنے میں مدد دی بلکہ باہمی تعاون کے نئے دروازے بھی کھولے۔ عالمی سیاست کے پیچیدہ اور کثیرالجہتی منظرنامے میں حالیہ برسوں کے دوران پاکستان نے جس حکمتِ عملی، سفارتی بصیرت اور تدبر کا مظاہرہ کیا ہے، اس نے نہ صرف ملک کی بین الاقوامی حیثیت کو مستحکم کیا بلکہ اسے ایک باوقار اور فعال ریاست کے طور پر بھی اجاگر کیا ہے۔ یہ امر کسی طور معمولی نہیں کہ ایک ایسے خطے میں، جہاں جغرافیائی سیاست (Geopolitics) کی بساط ہر لمحہ بدلتی رہتی ہے، پاکستان نے اپنے مفادات کا نہایت مہارت کے ساتھ تحفظ کیا اور عالمی برادری میں اپنی آواز کو موثر انداز میں منوایا۔ تاہم، تاریخ شاہد ہے کہ بیرونی کامیابیاں اس وقت تک پائیدار نہیں بن سکتیں جب تک ان کا عکس داخلی سطح پر نظر نہ آئے۔ یہی وہ نازک موڑ ہے جہاں پاکستان کو اپنی توجہ بیرونی محاذ سے ہٹا کر داخلی استحکام، ادارہ جاتی اصلاحات اور گورننس کے معیار کو بلند کرنے پر مرکوز کرنی ہوگی۔ اس تناظر میں تین بنیادی ستون ایسے ہیں جو ریاستی استحکام وترقی کے ضامن بن سکتے ہیں: ساختی اصلاحات، مالی کفایت شعاری، اور میرٹ و دیانت پر مبنی تقرریاں۔سب سے پہلے، ساختی اصلاحات (Structural Reforms)کی ناگزیریت پر غور کرنا ازحد ضروری ہے۔ پاکستان کا انتظامی و ادارہ جاتی ڈھانچہ کئی دہائیوں پر محیط روایتی پیچیدگیوں، غیر ضروری بیوروکریٹک رکاوٹوں اور فرسودہ طریقہءکار کا اسیر رہا ہے۔ ان حالات میں ہمیں ایسے اقدامات کی ضرورت ہے جو اداروں کو نہ صرف خودمختار بنائیں بلکہ انہیں جوابدہی کے موثر نظام سے بھی ہم آہنگ کریں۔ ڈیجیٹلائزیشن، شفافیت، اور کارکردگی پر مبنی نگرانی کے نظام کا نفاذ اس سلسلے میں کلیدی کردار ادا کر سکتا ہے۔ ٹیکس نظام کی ازسرِ نو تشکیل بھی اہم ترین ضرورت ہے۔ ایک ایسا نظام جو وسیع البنیاد ہو، ٹیکس چوری کے امکانات کو کم کرے، اور عوام میں اعتماد پیدا کرے، معیشت کو مضبوط بنیاد فراہم کر سکتا ہے۔ اسی طرح سرکاری اداروں، بالخصوص سرکاری ملکیتی کاروباری اداروں (State-Owned Enterprises)، کی کارکردگی کو بہتر بنانےکیلئے یا تو انکی نجکاری کی جائے یا انہیں جدید انتظامی اصولوں کے تحت ازسرِ نو منظم کیا جائے۔ دوسرا اہم ستون مالی کفایت شعاری (Fiscal Austerity) ہے، جو کسی بھی مستحکم معیشت کی ریڑھ کی ہڈی ہے۔ بدقسمتی سے پاکستان میں مالی بے ضا بطگی، غیر ضروری اخراجات، اور وسائل کے غیر موثر استعمال نے اقتصادی ڈھانچے کو کمزور کیا ہے۔ اب ریاست ایک واضح اور غیر مبہم پیغام دے کہ کفایت شعاری محض عوام کیلئے نہیں بلکہ حکمران طبقے کے لیے بھی لازم ہے۔ شفافیت اور احتساب کے موثر نظام کے بغیر مالی نظم و ضبط کا خواب ادھورا رہے گا۔ لہٰذا ضروری ہے کہ آڈٹ کے نظام کو مضبوط بنایا جائے، پارلیمانی نگرانی کو فعال کیا جائے اور ہر سطح پر مالی ذمہ داری کا احساس اجاگر کیا جائے۔ یہ اقدامات نہ صرف اندرونی استحکام کو فروغ دیں گے بلکہ بین الاقوامی سرمایہ کاروں کے اعتماد میں بھی اضافہ کریں گے۔تیسرا اور شاید سب سے اہم پہلو"صحیح آدمی کو صحیح کام" (Right Person for the Right Job)کے اصول کا نفاذ ہے۔ کسی بھی ریاست کی کامیابی کا دارومدار اسکے انسانی وسائل کے معیار پر ہوتا ہے۔ اگر کلیدی عہدوں پر تقرریاں میرٹ کے بجائے ذاتی تعلقات، سیاسی وابستگیوں یا وقتی مفادات کی بنیاد پر کی جائیں تو بہترین پالیسیاں بھی ناکامی سے دوچار ہو جاتی ہیں۔چنانچہ تقرریوں کے عمل کو مکمل طور پر شفاف، غیر جانبدار اور میرٹ پر مبنی بنایا جائے۔اس کے ساتھ ساتھ دیانت داری (Integrity) کو ایک بنیادی قدر کے طور پر فروغ دینا بھی ضروری ہے۔ ایسے افراد جو نہ صرف پیشہ ورانہ مہارت رکھتے ہوں بلکہ اخلاقی اعتبار سے بھی مضبوط ہوں، وہی اداروں کو حقیقی معنوں میں مضبوط بنا سکتے ہیں۔یہ کہنا بے جا نہ ہوگا کہ پاکستان اس وقت ایک سنہری موقع کے دہانے پر کھڑا ہے۔ عالمی سطح پر حاصل ہونیوالی کامیابیوں نے ایک ایسی فضا پیدا کر دی ہے جس میں داخلی اصلاحات کو نہ صرف ممکن بنایا جا سکتا ہے بلکہ انہیں پائیدار بھی بنایا جا سکتا ہے۔ تاہم، اس کے لیے عزم، بصیرت، اور عملی اقدامات کی اشد ضرورت ہے۔ اگر ریاستی قیادت ان تین بنیادی ستونوں کو اپنی ترجیحات میں شامل کر لے تو بعید نہیں کہ پاکستان نہ صرف خطے میں بلکہ عالمی سطح پر بھی ایک مستحکم، خوشحال اور باوقار ریاست کے طور پر ابھرے۔ یہ وہ لمحہ ہے جسے ضائع کرنا تاریخ کے ساتھ ناانصافی ہوگی، اور اسے بروئے کار لانا ایک روشن مستقبل کی ضمانت۔ پاکستان زندہ باد