فرمان الہی
نماز کے اوقات
چیف جسٹس اسلام آباد ہائی کورٹ سرفراز ڈوگر اور جسٹس محمد آصف نے 190 ملین پاؤنڈ کیس کی اپیلوں پر تحریری حکم جاری کر دیا۔
عدالت نے بانیٔ پی ٹی آئی اور بشریٰ بی بی کے وکلاء کو 20 مئی کو دلائل کی حتمی مہلت دیتے ہوئے کہا ہے کہ امید ہے کہ فریقین جان بوجھ کر سماعت سے غیر حاضر نہیں ہوں گے، نہ غیر ضروری التواء مانگیں گے۔
عدالتی حکم نامے کے مطابق سلمان صفدر نے بانیٔ پی ٹی آئی اور بشریٰ بی بی سے ہدایات لینے کے لیے التواء کی درخواست دی ، نیب نے سلمان صفدر کی التواء کی درخواست کی مخالفت کی۔
عدالتی حکم نامے میں مزید لکھا ہے کہ گزشتہ سماعت پر فریقین کو حاضری یقینی بنانے اور اپیل پر دلائل کی ہداہت کی گئی تھی، آج کی سماعت میں دلائل کی بجائے سلمان صفدر نے کمزور وجوہات پر التواء کی درخواست دی۔
عدالتی حکم نامے میں یہ بھی لکھا ہے کہ چونکہ مرکزی اپیلیں سلمان صفدر کی جانب سے دائر کی گئی تھیں اور اس کیس کی حساسیت اور اہمیت بہت زیادہ ہے اس لیے آخری اور حتمی مہلت دی جا رہی ہے، سلمان صفدر تمام ضروری اقدامات کر لیں اور آئندہ سماعت پر 20 مئی کو اپیلوں پر دلائل دیں۔
