فرمان الہی
نماز کے اوقات
ایرانی صدر مسعود پزشکیان نے کہا ہے کہ امریکا مفاہمت کی یادداشت کے تحت اپنی ذمے داریوں پر واپس آیا تو ایران بھی فوری طور پر مثبت جواب دے گا۔
شنگھائی تعاون تنظیم کے سربراہی اجلاس سے خطاب کرتے ہوئے مسعود پزشکیان نے کہا ہے امریکا کی جانب سے مفاہمت کی یادداشت کے تحت اپنی ذمے داریاں پوری نہ کرنے کا سلسلہ جاری ہے، ایران نے امریکی ذمے داریوں کی خلاف ورزی کا متناسب جواب دیا۔
پزشکیان نے کہا ہے کہ جغرافیائی سیاسی مسابقت میں اضافہ، یکطرفہ پالیسیوں کا فروغ، فوجی طاقت کا استعمال، غیر قانونی یکطرفہ پابندیاں اور معیشت و ٹیکنالوجی کو بطور آلہ استعمال کرنے کے رجحان نے ترقی پذیر ممالک، ابھرتی ہوئی معیشتوں کے لیے سنگین خدشات پیدا کر دیے ہیں۔
انہوں نے کہا ہے کہ خطے میں طاقت کے استعمال پر مبنی پالیسیوں کا تسلسل ممالک ہی نہیں بلکہ خطے اور دنیا کے استحکام کے لیے بھی خطرہ ہے۔
ایرانی صدر کا کہنا ہے کہ ایران پر امریکا اور اسرائیل کے حملے اقوامِ متحدہ کے منشور اور بین الاقوامی قوانین کے بنیادی اصولوں کی خلاف ورزی تھے۔
انہوں نے کہا کہ دو دوست اور برادر ممالک پاکستان اور قطر کی ثالثی میں تقریباً 3 ماہ کے مذاکرات کے بعد 18 جون 2026ء کو اسلام آباد مفاہمت کی یادداشت پر اتفاق ہوا، تاہم امریکا 2 ہفتوں سے بھی کم عرصے میں اپنی ذمے داریوں سے پیچھے ہٹ گیا۔
مسعود پزشکیان کا کہنا ہے کہ ایران نے ہمیشہ اپنے بین الاقوامی معاہدوں اور ذمے داریوں کی پاسداری کی ہے۔
