لاہور(خصوصی رپورٹر) عوامی تحریک کے سربراہ ڈاکٹر طاہر القادری نے حکومت کی طرف سے قومی سلامتی کے خلاف خبر یں شائع کروانے کے معاملے پر اپنے ردعمل میں کہا ہے کہ پرویز رشید کے خلاف کوئی ایکشن نہیں ہو گا ،کارروائی دکھاوا اور دھوکا ہے ۔خبر ڈرافٹ کروانے والا چند ماہ بعد پرویز رشید کو آب زم زم سے پاک صاف کر کے دوبارہ وزارت پر بحال کر د ے گا ۔رانا ثناء اللہ کو بھی سانحہ ماڈل ٹائون کیس میں وزارت سے ہٹانے کا ڈرامہ کیا گیا تھا اور پھر بحال کر دیا گیا ۔ مشاہد اللہ کوبھی فوج کے خلاف ایک انٹرنیشنل نیوز ایجنسی کو انتہائی توہین آمیز الزام تراشی پر مبنی سازشی انٹرویو دینے کے بعد فوج کی طر ف سے دبائو آنے پروزارت سے ہٹایا گیا تھا جو آج میاں نواز شریف کے ترجمان ہیں۔سربراہ عوامی تحریک نے کہاکہ جہاں سلامتی کے اداروں کے ساتھ بھی دھوکہ دہی ہو وہاں ملکی سلامتی کا اللہ حافظ ہے۔ حالت یہ ہو گئی ہے کہ ملکی سلامتی کے اداروں کے ساتھ بھی گھنائونے کھیل کھیلے جا رہے ہیں اور اس پر کوئی نشان عبرت نہیں بنتا ۔ مسلسل سلامتی پر حملے کرنے والا ماسٹر مائنڈ کو کٹہر ے میں کھڑا کیوں نہیں کیا جاتا ،اسکے خلاف آرٹیکل 6 کے تحت کارروائی میں کیا رکاوٹ ہے ؟ کیا اب بھی ثبوت درکار ہیں؟ پاکستان عوامی تحریک کے سربراہ ڈاکٹر محمد طاہر القادری انٹرنیشنل کانفرنس میں شرکت کیلئے گزشتہ روز لندن سے مراکش پہنچ گئے۔ طاہر القادری نے کراچی میں مجلس پر ہونیوالی فائرنگ کی شدید ترین الفاظ میں مذمت کرتے ہوئے اسے فرقہ واریت کو ہوا دینے کی سازش قرار دیا ۔
فرمان الہی
نماز کے اوقات
