اسلام آباد (نیوز ایجنسیز) فرحان محبوب نے چیف آف ایئر اسٹاف انٹر نیشنل اسکواش چیمپئن شپ2016 کا ٹائٹل اپنے نام کر لیا ہے۔ مصحف علی میر اسکواش کمپلکس اسلام آباد میں کھیلے گئے 25 ہزار امریکی ڈالرز انعامی رقم کے ٹورنامنٹ کا فائنل ورلڈ نمبر 52 فرحان زمان اور ورلڈ نمبر 106 فرحان محبوب کے درمیان کھیلا گیا۔ اس موقع پر چیف آف ایئر اسٹاف ایئرچیف مارشل سہیل امان مہمان خصوصی تھے۔ فائنل میچ کی پہلی گیم میں دونوں کھلاڑیوں نے اچھے کھیل کا مظاہرہ کیا تاہم فرحان محبوب نے اپنے تجربے کی بنیاد پر پہلی گیم میں 11۔9 سے کامیابی حاصل کر کے میچ میں سبقت حاصل کر لی۔ دوسری گیم میں فرحان محبوب نے فرحان زمان کو آؤٹ کلاس کرتے ہوئے 9 پوائنٹس کی سبقت حاصل کر لی تاہم فرحان زمان نے قدرے مزاحمت کی تاہم فرحان محبوب نے دوسری گیم میں بھی 11۔5 سے کامیابی حاصل کرکے میچ میں اپنی پوزیشن مضبوط کرلی۔ تیسری گیم میں فرحان زمان نے کم بیک کیا 11۔6 سے کامیابی حاصل کرکے فرحان محبوب کی میچ میں سبقت کم کر دی۔ چوتھی گیم میں فرحان محبوب نے فرحان زمان کے خلاف شاندار کھیل کا مظاہرہ کیا، فرحان زمان نے بھی کچھ اچھی شاٹس کھیلیں لیکن فرحان محبوب نے چوتھی گیم میں11۔5 سے کامیابی حاصل کرلی ۔ آخر میں مہمان خصوصی ایئرچیف مارشل سہیل امان نے مذکورہ ٹورنامنٹ کے فاتح فرحان محبوب کو ونر ٹرافی اور 3610 ڈالر کیش پرائز جبکہ فرحان زمان کو رنر اپ ٹرافی اور 2470 ڈالر کیش پرائز سے نوازا۔ سید رضی نواب نے مہمان خصوصی ایئر مارشل سہیل امان کو یادگاری شیلڈ بھی پیش کی۔
فرمان الہی
نماز کے اوقات
